Qyzylordada jeńil kólik darııaǵa sýǵa túsip ketti
Oqıǵa oblys ortalyǵyndaǵy «Rısmash» aýmaǵynda túngi saǵat 03:54 shamasynda bolǵan. Oblys tótenshe jaǵdaılar departamentine kelip túsken habarlamada darııaǵa «Daewoo Nexia» avtokólik túsip ketkeni aıtylǵan.
«Kóliktiń ishinde eki adam bolǵan. Onyń bireýi - 1994 jylǵy azamat óz kúshimen jaǵaǵa shyqqan. Sol jastaǵy taǵy bir azamat kóliktiń ishinde qalyp qoıǵan. Oqıǵa ornyna jedel-qutqarý jasaǵynan 1 tehnıkamen 5 adam bardy», - dep málim etti Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.
Vedomstvo málimetinshe, qutqarýshylar 04.20-da sý asty izdestirý jumystaryn bastady. Ázirge nátıje joq.
Eske salsaq, budan buryn Qyzylordada mal sýarýǵa barǵan adam sýǵa batyp ketti.
