Qyzylordada jeńil avtokólik órtenip, bir adamdy kúıik shaldy
QYZYLORDA. QazAqparat - Qyzylorda qalasynda jeńil avtokólik órtenip, bir adamdy kúıik shaldy, dep habarlaıdy QazAqparat tilshisi.
Oqıǵa búgin, 28 sáýirde saǵat 13.35-te oblys ortalyǵyndaǵy Ábýov kóshesi kóp qabatty turǵyn úıdiń janynda boldy. Sol sátte oblystyq tótenshe jaǵdaılar departamentine «Nexia» markaly jeńil avtokóligi tolyǵymen janyp jatqandyǵy jóninde habarlama túsken.
«Shaqyrtý kesh kelip túsýi saldarynan órtke qarsy qyzmet mamandary kelgenshe avtokóliktegi gaz qurylǵysy jarylǵan. Ol avtokóliktiń tolyǵymen janyp ketýine alyp keldi. Órtten 1996 jyly dúnıege kelgen jolaýshy 42% termııalyq kúıik alyp, qalalyq aýrýhanaǵa jatqyzyldy. Qazirgi tańda jaǵdaıy aýyr. Sonymen qatar avtokólik júrgizýshisi 1987 jylǵy azamatqa alǵashqy kómek kórsetilip úıine qaıtaryldy. Órtti tolyqtaı sóndirý maqsatynda órt sóndirý qyzmetinen 6 qyzmetker 1 birlik tehnıka kúshi paıdalanyldy. Jalyn 13.50-te tolyq sóndirildi», - dep málim etti Qyzylorda oblystyq tótenshe jaǵdaılar departamenti Órt sóndirý jáne apattyq-qutqarý jumystary qyzmetinen.
Eske salsaq, Qyzylorda qalasynda keshe 6 jasar bala joǵaldy.
