Qyzylordada «jeńgetaılyqpen» aınalysqan áıel qolǵa tústi
QYZYLORDA. QazAqparat - Qyzylorda qalasynda «jeńgetaılyqpen» aınalysqan 35 jastaǵy áıel qolǵa tústi, dep habarlaıdy QazAqparat tilshisi.
Ony Qyzylorda oblysy Polıtsııa departamentiniń uıymdasqan qylmysqa qarsy kúres basqarmasy qyzmetkerleri qolǵa túsirdi. Olar kelip túsken aqparat negizinde jedel jumystar júrgizgen bolatyn.
«Bul azamatsha buryn da qylmystyq jaýapkershilikke tartylǵan. Oǵan qatysty Qazaqstan Respýblıkasy Qylmystyq kodeksiniń 309-babynyń 1-bóligimen tergep-tekserý amaldary júrgizilýde. Qazirgi tańda ustalǵan azamatshanyń basqa da qylmystarǵa qatystylyǵy anyqtalýda», - dep jazylǵan Qyzylorda oblystyq polıtsııa departamentiniń baspasóz qyzmeti taratqan habarlamada.
Kúdiktiniń qylmysy dáleldengen jaǵdaıda sot sheshimimen múlki tárkilenedi. Oǵan bes jylǵa deıingi merzimge bas bostandyǵynan aıyrý jazasy taǵaıyndalýy múmkin.
