Qyzylordada jemqorlyqtyń aldyn alýda júıeli jumystar atqarylyp jatyr
Bul mindetter Elbasynyń 5 ınstıtýtsıonaldyq reformasyn júzege asyrý jónindegi «100 naqty qadam» Ult josparynyń 13-qadamynda kórsetilgen. Osy baǵyttaǵy jumystardyń nátıjesinde sońǵy jyldary oblys boıynsha sybaılas jemqorlyq derekteri tómendegen. Bul sıpattaǵy qylmystar 2016 jyly 145 derekti qurasa, ol 2017 jyly 121 qylmysqa azaıǵan. Osynyń nátıjesinde kórsetkish
16,6 paıyzǵa tómendegen.
«2018 jyldyń alǵashqy toqsanynda oblysta sybaılas jemqorlyq sıpatyndaǵy 39 (2017 jyldyń 3 aıynda - 47) qylmys tirkelip, bul ótken jyldyń dál osy kezeńimen salystyrǵanda 17 paıyzǵa azaıǵan. Sybaılas jemqorlyqtyń aldyn alý baǵytynda Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentimen sybaılas jemqorlyqtyń aldyn alý baǵytynda júıeli sharalar júrgizilip keledi. 2018 jyldyń І toqsanynda departament jemqorlyqtyń aldyn alý men sybaılas jemqorlyqqa qarsy is-qımyl zańnamalaryn túsindirý baǵytynda barlyǵy 799 is-shara uıymdastyrdy.
«Parasyz bolashaqqa. Birge!» jobasy aıasynda departament janynan qurylǵan mobıldi top 2018 jyldyń 5 aıynda jalpy sany 170 myńnan astam adamdy qamtyǵan kezdesý men qoǵamdyq qabyldaý ótkizdi. «Esikten esikke!» jobasy aıasynda kommýnaldyq qyzmetter boıynsha aqy tóleý túbirtekterine tirkelgen jemqorlyqqa qarsy flaerler taratylsa, qoǵamdyq kólikter men halyq kóp shoǵyrlanǵan oryndarda jemqorlyqqa qarsy plakattar ilinip, paraqshalar taratyldy», - dedi Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamenti basshysynyń orynbasary Berikbol Baıhojaev.
Sonymen qatar, mektep oqýshylary arasynda rýhanı-adamgershilikke jáne otansúıgishtikke tárbıeleý maqsatynda oblys mektepterinde «Adal urpaq» erikti oqýshylar klýby qurylyp jumys jasaýda. 2018 jyly osy klýbqa múshelikke ótken oqýshylar sany 15 myńnan asty.