Qyzylordada jeltoqsan aıynda kongo-qyrym qandy bezgegine shaldyǵý jaǵdaıy tirkeldi
QYZYLORDA. QazAqparat - Qyzylorda oblysynda Kongo-Qyrym qandy bezgegine shaldyǵý jaǵdaıy tirkeldi. Mundaı oqıǵa buǵan deıin qys mezgilinde oryn alǵan emes, dep habarlaıdy QazAqparat tilshisi.
Jańaqorǵan aýdany Quttyqoja aýyly turǵyny kongo-qyrym qandy bezgenine shaldyqty. Naýqastyń dıagnozy zerthanalyq jolmen naqtylandy. Qazirgi tańda ol Jańaqorǵan aýdandyq ortalyq aýrýhanasynyń juqpaly aýrýlar bóliminde em qabyldaýda. Naýqas mal sharýashylyǵymen aınalysady, jaldanyp mal baǵady.
«Jedel habarlama kelip túsken ýaqyttan bastap epıdemıologııalyq top quryldy. Aýrý oshaǵynda indetke qarsy is-sharalar kesheni tolyǵymen oryndaldy. Aýla, kúl-qoqys tastaıtyn oryn, naýqas mal baǵatyn sharýa qojalyǵyndaǵy oshaqta epıdemıologııalyq top mamandarymen zalalsyzdandyrý jumystary tolyq júrgizildi. Aýylsharýashylyǵy maldary kenege qarsy «Kreolın-H» preparatymen zalalsyzdandyryldy. Oshaqta mal qora men aýylsharýashylyq maldarynan keneler anyqtalǵan joq. Epıdemıologııalyq zertteýler barysynda naýqaspen qarym-qatynasta 9 adam bolǵany anyqtaldy. Olardyń barlyǵy da medıtsınalyq baqylaýǵa alyndy. Onyń ishinde naýqaspen tyǵyz qatynasta bolǵan jubaıy men qyzy aýdanaralyq aýrýhananyń juqpaly aýrýlar bólimine jatqyzyldy. Qazirgi tańda profılaktıkalyq tolyq emin alyp, úıine shyǵaryldy. Naýqasqa standartty algorıtm boıynsha em taǵaıyndalyp, júrgizildi. Búgingi kúni naýqastyń jaǵdaıy qalypty», - dep málim etti Qyzylorda oblysynyń taýarlar men qyzmetterdiń sapasy men qaýipsizdigin baqylaý departamenti basshysynyń orynbasary Álııa Ábdiqaıymova.
Álııa Ábdiqaıymovanyń aıtýynsha, kene shaǵý jaǵdaıy oryn alǵanda mindetti túrde turǵylyqty meken-jaıyńyz boıynsha medıtsınalyq kómekke júginýińiz qajet. Kómekke erte júginý arqyly aýrýdyń asqynýyn boldyrmaýǵa bolady.
Negizinde keneler naýryz ben qyrkúıek aralyǵynda belsendi, al mamyr-shilde aılarynda olar kúsheıe túsedi. Alaıda kene shaǵý derekteri qys mezgilinde de kezdesip jatady. Qazirgi tańda Qyzylorda oblysynyń ońtústigindegi Jańaqorǵan jáne Shıeli aýdandarynda aýa raıy jylylyǵymen erekshelenip tur. Sondyqtan keneler áli de belsendiligin joıǵan joq.
Budan buryn Qyzylordada kúıdirgi aýrýynyń 60 oshaǵy bar ekenin habarlaǵan bolatynbyz.
