Qyzylordada jeke balabaqshalar sapasy syn kótermeıdi
QYZYLORDA. QazAqparat - Qyzylorda oblysyndaǵy jeke balabaqshalardyń sapasy syn kótermeıdi, dep habarlaıdy QazAqparat tilshisi.
Qyzylorda oblysynyń ákimi Qyrymbek Kósherbaevtyń tóraǵalyǵymen ótken májiliste atalmysh másele jan-jaqty talqylandy. Aımaq basshysy bul máselelerdi sheshý joldaryn tarazylap, tıisti salalarǵa naqty mindetter júktedi.
Syr óńirinde balabaqsha jelisi tolyqtaı qalyptasqan. Oblysta 3-6 jastaǵy búldirshinder mektepke deıingi mekemelermen tolyq qamtylǵan. Balabaqshalarda 6964 pedagog qyzmet etedi. Olardyń ishinde 48,2 paıyzy - mektepke deıingi tárbıe jáne oqytý mamandary. Degenmen jekemenshik balabaqshalarda ol 2 esege tómen bolyp otyr. Qazirgi tańda 566 pedagogtyń biliktiligin arttyrýǵa kóńil bólindi. Oblystyq bilim basqarmasynyń basshysy Maıra Meldebekova mektepke deıingi bilim men tárbıe berýge oraı arnaıy Jol kartasy ázirlenip jatqanyn aıtady. Ol Elbasy Joldaýynda atap kórsetilgen.
«Bizdiń óńirde balabaqshamen qamtý isi tolyq sheshildi. Dese de jekemenshik balabaqsha sapasy syn kótere bermeıdi. Atap aıtqanda, 2000-nan astam tárbıeshiniń bilim sapasy talapqa saı emes. Qazirgi tańda jahandyq jeli betterinde mundaı mekemelerde balalardy uryp-soǵý oqıǵalary jaıynda aıtylyp jatady. Mundaı derekter bizdiń óńirde tirkele qoıǵan joq. Degenmen ondaı jaǵdaıdyń aldyn alýymyz tıis. Tárbıeshilerdiń biliktilik deńgeıi - basty talaptyń biri. Іshki mádenıeti tómen tárbıeshi mundaı mekemede jumys jasamaýy tıis», - dedi oblys ákimi Qyrymbek Kósherbaev.
Sondaı-aq, bilim berý mekemelerin beınebaqylaý júıesimen qamtamasyz etý boıynsha naqty ister qolǵa alyna bastady. Qazir óńirde jumys jasap jatqan 662 balabaqshanyń 241-i sondaı júıemen qamtamasyz etilgen. Ol 36,4 paıyzdy quraıdy. Al mektepterdiń 87 paıyzynda osyndaı beınebaqylaý kameralary ornatylǵan. Degenmen olardyń kópshiligi bilim berý orynldarynyń syrtqy bóligine ornatylǵan. Oblystyq bilim basqarmasynyń basshysy Maıra Meldebekova osyndaı júıemen qamtamasyz etý úshin 92 mln teńge qajet ekenin aıtty.
