Qyzylordada jataqhanalardyń tehnıkalyq jaǵdaıyn anyqtaıtyn komıssııa jumysyn bastady
QYZYLORDA. QazAqparat - Oblys ákimi Qyrymbek Kósherbaevtyń tapsyrmasyna sáıkes qaladaǵy jataqhanalardyń jaǵdaıyn anyqtaıtyn arnaıy komıssııa quryldy, dep habarlady QazAqparat tilshisi.
Komıssııa jumysynyń nátıjesi osy jyldyń 12 naýryzynda belgili bolady. Bul týraly Óńirlik kommýnıkatsııalar qyzmetinde ótken baspasóz máslıhatynda oblystyq memlekettik sáýlet-qurylys baqylaýy basqarmasynyń basshysy Marsbek Moldabaev málimdedi.
Oblys ákiminiń orynbasary Serik Súleımenov tóraǵalyq etetin komıssııa quramyna turǵyn úı kommýnaldyq sharýashylyǵy men qurylys salalarynyń jaýapty mamandary engen.
«Oblys ákiminiń tapsyrmasyna sáıkes jataqhanalardyń tehnıkalyq jaǵdaıyn anyqtaıtyn arnaıy komıssııa quryldy. Búgin komıssııa músheleri jumysqa kiristi. Komıssııa 10 kún boıy jumys istep, 12 naýryzda nátıjesin usynady", - dedi Marsbek Moldabaev.
Komıssııa jumysynyń qorytyndysy boıynsha anyqtalǵan máselelerdi sheshýge arnalǵan sharalar tizbegi ázirlenip, tıisti is atqarylady.
«Qalada 22 jataqhana bar, olar negizinen 70-90 jyldary salynǵan»,- dedi qala ákiminiń orynbasary Asylbek Shámenov.
Esterińizge sala ketsek, 28 aqpan kúni Qyzylordada Tıtov turǵyn aýdany 16A jataqhananyń bos turǵan bir bóligi opyrylyp túsken. Ózge bóliginde turǵan 46 otbasy evakýatsııalandy. Oblys ákimi Q.Kósherbaevtyń tapsyrmasyna sáıkes turǵyndar 6 aıǵa ýaqytsha baspanamen qamtamasyz etildi, qarjysy jergilikti bıýdjetten bólinedi. 1-2 kúnniń ishinde olar páterlerge kóshiriledi. Atalǵan jaǵdaıǵa baılanysty qurylǵan arnaıy komıssııa otbasylardy zań talaptaryna sáıkes baspanamen qamtý úshin ár januıanyń jaǵdaıyn zerttep jatyr. Sonymen qatar, qulaǵan jataqhanany buzý týraly sheshim qabyldandy.
Bul jaǵdaı oblys ákimdiginiń jiti baqylaýynda.
