Qyzylordada «jasyl beldeý» salynady
Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda «Týǵan jer» baǵdarlamasy arqyly qalalardy kógaldandyrýǵa, mektepterdi kompıýterlendirýge, jergilikti joǵary oqý oryndaryna demeýshilik jasaýǵa, mýzeıler men galereıalar qoryn baıyta túsýge bolatyny aıtylǵan.
Bul maqsatta oblys ortalyǵy aýmaǵynda 534 gektar jer bólinedi. Atalǵan jobany júzege asyrý baǵytynda tıisti qarjy qaralyp, búgingi kúnderi jobalyq-smetalyq qujattary ázirlenýde.
«Jasyl beldeýdi» ornalastyrý sharalary úsh baǵytta júrgiziledi. Alǵashqysy - Jezqazǵan, ekinshisi - Syrdarııa aýdany baǵytyn qamtysa, úshinshi baǵyty «Batys Qytaı - Batys Eýropa» boıynsha júrgiziledi.
«Sondaı-aq, oblys ákiminiń tapsyrmasyna sáıkes jergilikti bıýdjet esebinen oblystyń barlyq eldi mekeninde «jasyl beldeý» ornlastyrýǵa mán berilip otyr. Oǵan jergilikti bıýdjet esebinen qarjy qaralmaq»,. - dedi oblystyq tabıǵı resýrstar jáne tabıǵat paıdalanýdy retteý basqarmasynyń basshysy Aıdar Abdýalıev.
Aıta keterligi, Aral teńiziniń qurǵaǵan ultanynda ushqan shań men tuzdy toqtatý maqsatynda sońǵy 25 jylda 173 myń gektar aýmaqqa sekseýil aǵashtary egildi. Bul maqsatta oblystyq bıýdjetten qarjy bólinedi. Bıyl bul aýmaqta 5 myń gektar jerge sekseýil kóshetteri otyrǵyzylmaq. Sondaı-aq, qazir ol óńirde Ońtústik Koreıanyń orman sharýashylyǵy qyzmetimen birlesken «Aral teńiziniń qurǵaǵan ultanynda fıtoorman melıoratsııalyq jumystaryn júrgizý» jobasy júzege asyrylýda. Nátıjesinde 2018-2019 jyldarda sol aýmaqta 10 myń gektar sekseýil egildi.
Budan buryn Qyzylordada «Máńgilik mádenıet» jobasy qolǵa alynǵanyn habarlaǵan edik.