Qyzylordada «Jastar úıiniń» ǵımaraty paıdalanýǵa berildi

Bul ıgi sharaǵa oblys ákimi B. Qýandyqov pen qala ákimi M. Jaıymbetov qatysty.

Taǵdyrdyń jazýymen ata-ana qamqorlyǵynsyz qalǵan jastardy «Jas jetkinshekterdi áleýmettik beıimdeý ortalyǵy» óz qamqorlyǵyna alǵan. Búginde bes qabatty «Jastar úıiniń» árqaısysy 4 bólmelik 5 sektsııadan turatyn birinshi qabatynda 16-23 jas aralyǵyndaǵy jetkinshekter qonystanǵan. Mundaǵy páterler sany 47 oryndy quraıdy. Olardyń munda tolyqqandy otbasyndaǵy balalardaı ómir súrýine barlyq jaǵdaı jasalǵan. Arnaıy kıim útikteıtin jáne kir jýatyn bólmeler de bar.

Aıta keteıik, «Jastar úıinde» turyp jatqan ár balanyń tamaqtanýyna memleketten aı saıyn 12 myń teńge kóleminde qarjy bólinedi. Osy qarjyǵa «Jastar úıiniń» qazirgi turǵyndary azyq-túlik ónimderin birlesip satyp alyp, ashanada kezekshilikpen as ázirlep, birge tamaqtanýdy ádetke aınaldyrǵan. Ortalyqta tárbıelenip jatqan jastardyń qaladaǵy qoǵamdyq-mádenı is-sharalarǵa, sporttyq jarystarǵa qatysýyna erekshe mán berilgen. Osy rette, jastardy qala ishinde tasymaldaýǵa oblys ákiminiń Prezıdent kúni qarsańynda syıǵa tartqan «Gazel» avtokóligi taptyrmas kómekshi bolyp otyr. Sondaı-aq, tárbıelenýshi jastar qolóner, sýret salý úıirmelerine qatysyp, mýzykalyq stýdııada jumys jasaı alady. Qazirgi ýaqyttyń ózinde quramy 6 baladan turatyn «Jastar» ansambli de qurylyp úlgergen. Ansambl jańa jyl merekesine qyzý daıyndyq ústinde. Al, 2-5 qabattardaǵy bir bólmelik 65 páterde 23 pen 29 jas aralyǵyndaǵy jastar ornalasýda. Olardyń qatarynda jas otbasylar da bar.