Qyzylordada jastar eńbek jasaqtary belsendi qyzmet atqaryp keledi
Sońǵy bes jyldan beri oblysta «Jas qurylysshylar» eńbek jasaǵy belsendi qyzmet kórsetip júr. Sol ýaqyttan bastap 1600-ge jýyq jas maýsymdyq jumyspen qamtyldy. Olardyń arasynda oqýshylar, stýdentter, jumyssyz jastar, balalar úıiniń túlekteri jáne taǵdyrdyń jazýymen jazasyn ótep shyqqandar bar. Olar 16-29 jas aralyǵyndaǵy qyzdar men jigitter bolyp tabylady.
Osy maqsatta oblystyq jastar saıasaty basqarmasy naqty is-sharalar júrgizip keledi. Ústimizdegi jyldyń ózinde bul baǵytta birqatar jumystar júzege asty. Basqarma mamandarynyń aıtýynsha, bıyl birqatar jobalar aıasynda ártúrli baǵytta 70 shara uıymdastyrylǵan. Atap aıtqanda, «Jas qurylysshylar» eńbek jasaǵynyń sarbazdary arasynda dánekerleýden baıqaý ótti. Baıqaý barysynda jastar atalmysh kásiptiń qyr-syryna qanyqty. Qarapaıym eńbek ıeleriniń tájirıbesine zer saldy.
«Biz jastar arasynda jumysshy mamandyqtardy nasıhattaýǵa mańyz berip kelemiz. Osy maqsatta stýdentter jáne jumyssyz jastardyń qatysýymen óńirdegi irgeli kásiporyn tynys-tirshiligimen tanysý sharalary ótkizildi. Atap aıtqanda, olar «Abzal jáne K» TS, «Qyzylorda jylý elektr ortalyǵy» MQK, «Jan Araı», «Nýrstroı LTD», «Haý ıÝ ınternatsıonal Qyzylorda» jaýapkershiligi shekteýli seriktestikteri sekildi mekemelerge ekskýrsııa jasady. Sondaı-aq, aýdandarda jáne saýda oryndarynda 20 qoǵamdyq qabyldaý bolyp ótti. Jastar qaıyrymdylyq sharalaryna da belsene atsalysyp keledi. Olar turmysy tómen 5 otbasynyń úıinde tazalyq, syrlaý, ákteý jumystaryna belsene qatysty.
Taǵy bir aıta keterligi, jastar arasynda «AutoCAD» baǵdarlamasy boıynsha syzba baıqaýy, «Sylaq sylaý» saıysy, jastar isi jónindegi komıtet músheleri arasynda ulttyq sport túrlerinen jarys bolyp ótti. Oǵan qosa «Azamattyq bastamalar», «Jańa álemge jol salamyz», «Tulǵalyq qasıetti damytý» taqyryptarynda semınar-trenıngter ótkizildi. Syr óńirindegi 20 oqý ornynda «Jas qurylysshylar» eńbek jasaǵynyń jumysy nasıhattaldy», - dedi oblystyq jastar saıasaty basqarmasynyń basshysy Qýanysh Januzaqov.
Sońǵy jyldary óńirde jastar arasynda dánekerleý, turmystyq tehnıkalardy jóndeý, kólik tehnıkasy jáne ony basqarý baǵytynda tıisti jumystar atqarylyp keledi. Osy maqsatta sheberlik saǵattar ótkizildi. Oǵan qosa jastardy jumyspen qamtý maqsatynda iri kásiporyn basshylarymen kezdesý uıymdastyrylǵan.
Osyndaı oń bastamalardyń nátıjesinde jergilikti kásipornynda jastar isi jónindegi komıtetter ashylyp otyr. Bıyl olardyń qatary taǵy da úsheýge tolyqty.
«Alda atqarylatyn is-sharalar jospary jasalǵan. Ústimizdegi jyldyń qarasha aıynda «Úzdik maman» oblystyq baıqaýy ótkiziledi. Oǵan qala men aýdandardan saıyskerler keledi. Taǵy bir aıta keterligi, qala jáne barlyq aýdandarda oqýshylarǵa kásibı baǵyt-baǵdar berý boıynsha semınar-trenıngter, kezdesýler ótkiziledi. Jastar eńbek jasaqtary qyzmetterin damytý baǵytynda áleýmettik qyzmetti uıymdastyrý jobasy boıynsha 300 jasty eńbekpen qamtý josparlanǵan edi. Oǵan belsene qatysqandar arasynan 65 jas joba aıasynda turaqty jumysqa ornalasty», - dedi Q.Januzaqov.
Buǵan deıin habarlaǵanymyzdaı, Syr óńirinde qurylǵan «Jaqaev izbasarlary» eńbek lageri jastary da sońǵy býyn ókilderine ónegeli isti dáriptep keledi. Olardyń negizgi maqsaty - jastardy aýylda eńbek etýge shaqyrý. Eńbek lageri óńirdegi túrli oqý oryndarynyń stýdentterinen jasaqtalǵan. Jastar aýyldyq jerlerde taza eńbek maıdanyna nazar aýdaryp, qarapaıym dıqan qaýymynyń tynys-tirshiligine zer saldy.
Eske sala ketsek, QR Prezıdenti «Qazaqstandyqtardyń ál-aýqatynyń ósýi: Tabys pen turmys sapasyn arttyrý» atty halyqqa Joldaýynda jyldy «Jastar jyly» dep jarııalaǵan bolatyn.
