Qyzylordada jasóspirimdi qaǵyp, oqıǵa ornynan ketip qalǵan júrgizýshi ustaldy

QYZYLORDA. QazAqparat – Qyzylordada kóligimen jasóspirimdi qaǵyp, oqıǵa ornynan boı tasalaǵan júrgizýshi ustaldy, dep habarlaıdy QazAqparat tilshisi.

Oqıǵa oblys ortalyǵyndaǵy Qorqyt Ata jáne Ybyraı Jaqaev kósheleriniń qıylysynda bolǵan. Jaıaý júrginshiler ótkelinen ótpekshi bolǵan jasóspirim qyzdy qaǵyp ketken júrgizýshi avtokóligimen oqıǵa bolǵan jerden boı tasalaǵan. Jaraqattanǵan jasóspirim aýrýhanaǵa jetkizildi.

«Bul oqıǵa boıynsha oblystyq polıtsııa departamenti jergilikti polıtsııa qyzmeti basqarmasy tarapynan izdestirý jumystary júrgizildi. Nátıjesinde «Mitsubishi Galant» úlgisindegi avtokólik júrgizýshisi ustaldy. Zań buzýshyǵa qatysty QR Ákimshilik quqyq buzýshylyqtar týraly kodeksiniń eki baby boıynsha, ıaǵnı 610-babynyń 2-bóligimen jáne 611-babynyń 2-bóligimen ákimshilik hattamalar toltyryldy», - dep málim etti Qyzylorda oblystyq polıtsııa departamentinen.

Eske salsaq, budan buryn toı ústinde oq atqan qyzylordalyqqa qatysty tergeý bastalǵan bolatyn.