Qyzylordada jasóspirimder tóbelesip, bireýi pyshaq jaraqatyn aldy
13 mamyr kúni kópqabatty úılerdiń biriniń aýlasynda jasóspirimderdiń arasynda janjal týyndap, toptyq tóbeleske ulasqan. Patrýldik polıtsııa batalonynyń qyzmetkerleri tóbelestiń jolyn kesip, oqıǵa ornynan qalalyq PB-na 14 jasóspirimdi jetkizdi.
Tóbeles saldarynan bir jasóspirim pyshaq jaraqatyn alyp, medıtsınalyq mekemege jetkizildi. Jasóspirimniń ómirine eshqandaı qaýip tónip turǵan joq. Kúdikti retinde kámeletke tolmaǵan jasóspirim anyqtalyp, bas sharasy kúzetpen ustaý jónindegi bultartpaý sharasy tańdaldy. Qalǵan jasóspirimderdiń is-áreketine quqyqtyq baǵa beriletin bolady. Oqıǵanyń mán-jaıy anyqtalýda.
Atalǵan derek boıynsha QR QK-niń 293-babynyń 3-bóligi 2-tarmaǵymen (Buzaqylyq, sýyq qarýdy ne densaýlyqqa zııan keltirý úshin arnaıy laıyqtalǵan basqa da zattardy qoldanyp jasalǵan is-áreketter) sotqa deıingi tergep-tekserý amaldary júrgizilýde.
Toptyq tóbeleske qatysqan jasóspirimderdiń ata-analaryna qatysty QR ÁQBtK 127-baby 3-bóligine (Ata-ananyń nemese zańdy ókilderiniń balalaryn tárbıeleýde mindetterin oryndamaýy kámeletke tolmaǵan adamnyń qylmystyq ne ákimshilik quqyq buzýshylyq belgileri bar qasaqana is-áreket jasaýyna alyp kelgen is-áreketi) sáıkes ákimshilik shara kórý máselesi qarastyrylýda.
Qyzylorda qalalyq PB-nyń basshylyǵy ata-analardy kámeletke tolmaǵan balalarynyń túngi ýaqytta úıden tys jerde úlkenderdiń qaraýynsyz júrmeýin qatań eskertedi. Olardyń qaraýsyz júrýi quqyq buzýshylyq jasaýynyń negizgi sebebi bolýy múmkin ekenin taǵy da atap aıtady. Osyǵan oraı, polıtsııa qyzmetkerleri ata-analarǵa jáne de memleketttik jáne memlekettik emes uıymdardyń jetekshilerine balalarǵa degen baqylaýdy jáne jaýapkershilikti kúsheıtip, qaýipsizdigin qamtamasyz etý baǵytyndaǵy sharalardy arttyrý qajettigin eskertedi.