Qyzylordada jas ónerpazdar jyr keshin ótkizdi
QYZYLORDA. QazAqparat - Qyzylorda qalasynda «Jyrlasa jastar jyrlasyn» ataýymen respýblıkalyq dástúrli án men jyr keshi ótkizildi, dep habarlaıdy QazAqparat tilshisi.
Atalmysh sharaǵa Syr óńiri ónerpazdarymen birge Jetisý, Qostanaı, Oral, Pavlodar aımaqtarynan belgili ánshiler qatysty. Olardyń qatarynda Maqpal Toqtaǵanova, Alpysbek Ońaıbaıuly, Saltanata Qızatova syndy ánshiler bar. Al kópshilik aldynda án men jyrdan shashý shashqan jergilikti ónerpazdar Kúnsulý Túrikpen, Marat Súgirbaı, Erkebulan Shyńjanov, Beısembek Tóleýbaı, Ádilhan Qýańbaev, Nurtilek Aqtaev, Muhamedálı Bekpeıisov, Qýanysh Alǵazıev, Jarashan Tólebaı, Zýlfııa Baımyrzaeva jáne Amandyq Japparberdıev halyq qoshemetine ıe boldy. Sondaı-aq, jurtshylyq aldynda Qazanǵap atyndaǵy Qyzylorda mýzykalyq kolledji men Qorqyt ata atyndaǵy Qyzylorda memlekettik ýnıversıtetiniń dástúrli án-terme bóliminde tálim alyp júrgen daryndy órender óner kórsetti.
Aıta keterligi, atalmysh is-sharany uıymdastyrýǵa jastardyń ózi uıytqy bolǵan. Ideıa avtorlary jáne uıymdastyrýshylary - belgili jas jyraýlar Marat Súgirbaı men Kúnsulý Túrikpen. Olardyń aıtýynsha, óner dodasy Tuńǵysh Prezıdent - Elbasynyń «Rýhanı jańǵyrý: bolashaqqa baǵdar» jáne «Uly Dalanyń jeti qyry» baǵdarlamalyq maqalalary aıasynda qolǵa alynyp otyr.
«Sondaı-aq, atalmysh shara bıylǵy Jastar jylyna da arnalǵan. Maqsatymyz - dástúrli án, jyr, termeni tyńdarmanǵa jańa sıpatta usyný. Osylaısha ósıet pen ónegege toly tekti sózdiń tóresi ulyqtaýǵa jol ashyldy», - dedi olar.
