Qyzylordada jas kásipker robototehnıka mektebin ashty
Serikbol Eralıev bul isin bastamas buryn qaladaǵy qosymsha bilim berý oqý-ádistemelik ortalyǵynda robototehnıka úıirmesinde jetekshi bolyp qyzmet etken. Odan keıin óz isin ashýǵa táýekel etti. Robototehnıka mektebin ashýǵa 2,4 mln teńge jumsaǵan. Onyń ishinde 500 myń teńgesin «Samruk-kazyna trust» áleýmettik jobalardy damytý qorynyń tamyz aıynda uıymdastyrǵan baıqaýynda jeńip alǵan edi.
Robototehnıka mektebine jasy 6-ǵa tolǵan balalardan bastap kez kelgen nıet bildirýshiler qatysa alady. Mektep aqyly negizde júrgiziledi. Al múmkindigi shekteýli balalarǵa sabaqtar tegin ótkiziledi. Robototehnıka mektebine qatysýshylar aptasyna 4 saǵat oqıdy.
«Mektepti ashýǵa túrtki bolǵan jaıt qazirgi zamannyń talaby. Robototehnıka salasy óte qarqyndy damyp kele jatyr. Mektepke qajetti qural-jabdyqtardy ár elden jınaqtadyq. Máselen, keı quraldar Danııadan aldyryldy, endi birin Reseıden, Qytaı, Almaty, Astanadan aldyq. Mektepti ashqannan keıin keshendi jasaǵan jón. Sondyqtan da materıaldyq bazanyń tolyq bolýyna kóńil bóldik», - deıdi S. Eralıev.
Munan ózge, Serikbol aıyna bir ret osy mektepte oqıtyn balalardyń barlyǵynyń basyn qosyp, jalpy is-shara ótkizýdi qolǵa almaq. Ol tehnıkamen áýes balalar momyn, tomaǵa-tuıyq keletinin aıtady. Al jalpy kópshilik sharalar balalardyń minezin ashýǵa septigin tıgizedi.
Aıta keteıik, mekteptiń ashylýyna oblystyq kásipkerler palatasy qoldaý bildirdi.