Qyzylordada jas aqyndar músháırasynyń jeńimpazdary anyqtaldy
NUR-SULTAN. QazAqparat - Sybaılas jemqorlyqqa qarsy is-qımyl agenttiginiń tóraǵasy Alık Shpekbaev pen Qyzylorda oblysynyń ákimi Qýanysh Ysqaqov «Aqynnyń qalamy – adaldyq alańy» atty oblystyq jas aqyndar músháırasynyń jeńimpazdaryn marapattady.
Bul týraly QazAqparat Sybaılas jemqorlyqqa qarsy is-qımyl agenttigine silteme jasap habarlaıdy.
Oblystyq jastar resýrstyq ortalyǵynda Jastar jyly aıasynda aımaqtaǵy shyǵarmashyl jastardyń shabytyn shyńdaý maqsatynda Qyzylorda oblysynyń ákimdigi, QR Sybaılas jemqorlyqqa qarsy is-qımyl agenttiginiń Qyzylorda oblysy boıynsha departamenti jáne «Aqmeshit – adaldyq alańy» jobalyq keńsesiniń uıymdastyrýymen ótken «Aqynnyń qalamy – adaldyq alańy» atty oblystyq jas aqyndar músháırasynyń jeńimpazdary anyqtaldy.
Jas aqyn Beıbit Nurdáýlet:
«Eshkim joq aqıqattan asqan áli,
Aqıqat adaldyqtyń bas qadamy.
Úmit artsań qol sozyp erteńińe,
Erteńgi kún búginnen bastalady» – dep jyrlaǵandaı, sharanyń maqsaty jastar boıynda adaldyq pen senimdilikti, parasattylyqty jáne sybaılas jemqorlyqqa múldem tózbeýshilikti qalyptastyrý, otansúıgishtikti keńinen nasıhattaý, jas aqyndar shyǵarmashylyǵyna qoldaý boldy.
Jeńimpazdardy marapattaý sátinde Alık Shpekbaev: «Aqyl – jastan, asyl – tastan degendeı, aqyl da, tyń ıdeıa da jastardan bastaý alady. Demek, jemqorlyqsyz, jańa turpatty qoǵam qurý jastardyń qolynda», – dedi.
Shynymen de, myńjyldyǵyn oılaǵan el sanaly urpaq tárbıeleıtini anyq.
Músháıra qorytyndysymen jas aqyndar shyǵarmalaryn jınaqtap, baspaǵa usynyp kólemdi danada shaǵyn kitapsha shyǵaryp, halyq arasynda parasattylyq qundylyqtaryn keńinen nasıhattaý josparlanýda.
