Qyzylordada jartysy qulaǵan úı: Turǵyndar jańa páterlerge kóship jatyr
QYZYLORDA. QazAqparat - Qyzylordada tún ishinde bir bóligi opyrylyp túsken úıdiń turǵyndary jaldamaly páterlerge kóshirilip jatyr, dep habarlaıdy QazAqparat.
Tótenshe jaǵdaı saldarynan adamdar birneshe kún qaladaǵy №2 mekteptiń ǵımaratyn panalaǵan bolatyn.
«Kóshirilip jatqan januıalar alǵashqy ýaqytta paıdalanatyn turmystyq zattarmen qamtamasyz etildi. Qazirgi ýaqytta 32 otbasy jańa jerge kóshirildi. Búgin keshke deıin qalǵandary jańa qonystarynda bolady. Jeke demeýshilik jasaýǵa nıetti azamattardan kómek bolyp jatyr. Jalpy, turǵyndardyń kópshiligi jańa úılerin ózderi tańdady. Eshqandaı túıitkildi másele bolyp jatqan joq», - dep túsinik berdi Qyzylorda qalasy ákimdiginiń baspasóz qyzmeti.
Turǵyndar jaldamaly páterde 6 aı turatyn bolady. Jergilikti bılik barlyq shyǵyndy ótep beredi. Bul osy ýaqyt ishinde baspanasyz qalǵandardy turaqty úımen qamtamasyz etý máselesi tolyǵymen sheshilmek.
Eske sala keteıik, Qyzylorda qalasy Tıtov kentindegi №16 turǵyn úıdiń bir bóligi opyrylyp qulaǵany týraly buǵan deıin habarlaǵan bolatynbyz.
