Qyzylordada jappaı kásipkerlikti damytý sharalary talqylandy
ASTANA. QazAqparat - Qyzylorda oblysynyń ákimi Qyrymbek Kósherbaevtyń tóraǵalyǵymen óńirde jappaı kásipkerlikti damytý boıynsha jeti aıdy qorytyndylaǵan májilis ótti. Oǵan aýdandar men qala ákimderi, basqarma basshylary jáne ózge de jaýapty tulǵalar qatysty.
«Ózderińizge belgili, men árdaıym barlyq deńgeıdegi ákimderge salyq bazasyn ulǵaıtý, turaqty jumys oryndaryn qurý jáne qoǵamdyq-saıası ahýaldy jaqsartý týraly 3 mindetti qoıyp kelemin. Al bul mindetterdi túpkilikti sheshýdiń bir joly - ol jergilikti jerde jappaı kásipkerlikti damytý bolyp tabylady. Ózderińiz bilesizder, oblysymyzda jappaı kásipkerlikti damytý úshin bıylǵy jyly óńirimizde Biryńǵaı jol kartasy ázirlenip, naýryz aıynda meniń tóraǵalyǵymmen qala men barlyq aýdandarda aktıv otyrystary ótkizilip, atalǵan «Jol kartasy» barlyq deńgeıdegi aýyl ákimderine tanystyryldy»,- dedi oblys ákimi Q.Kósherbaev.
Aımaq basshysynyń aıtýynsha, bıznesti túbegeıli jaqsartý jáne keńeıtý, jappaı kásipkerlikti qoldaý tetikterin odan ári jetildirý, sonyń ishinde otbasylyq kásipkerlikti damytý baǵytynda birqatar úkimettik jáne óńirlik baǵdarlamalar iske asyrylyp, qarajattar bólinýde.
Bıylǵy jyldan bastap iske asyrylǵan Nátıjeli jumyspen qamtý jáne jappaı kásipkerlikti damytý baǵdarlamasy sheńberinde jumyssyz jáne ózin-ózi jumyspen qamtyǵan azamattarǵa kásip ashý úshin shaǵyn nesıeler berý maqsatynda 2 mlrd teńgeden astam qarajat (aýyldyq jerde - 1 765 mln teńge, qalada - 293 mln teńge) bólinip, barlyq qarjy ınstıtýttaryna salynyp, ıgerilýde. Sondaı-aq, shaǵyn kásip sýbektileri jeńildetilgen nesıe qarajatyn alý maqsatynda bıylǵy jyly oblystyq bıýdjetten qosymsha 100 mln teńge qarjy Óńirlik ınvestıtsııalyq ortalyqqa bólindi. Odan bólek, sapaly oqytýdy uıymdastyrý men jastar tájirıbesin qoldaýǵa 1,6 mlrd teńge qarajat qarastyrylǵan.
Atalǵan baǵdarlama tek jumyssyz jáne nátıjeli jumyspen qamtylmaǵan halyqqa baǵyttalǵan bolsa, al turaqty bızneske baǵyttalǵan «Bıznestiń jol kartasy - 2020» baǵdarlamasy iske asyrylýda. Bul baǵdarlama sheńberinde búgingi kúni maquldanǵan jobalar boıynsha 1 mlrd teńge kóleminde sýbsıdııa tóleý múmkindigi bar. Bul tek qana sýbsıdııalaýǵa bólingen qarajat bolsa, ekinshi deńgeıli bankterde shaǵyn jáne orta bıznesti nesıelendirýge 10 mlrd teńgeden astam qarajat qarastyrylǵan.
Sondaı-aq, baǵdarlama sheńberinde nesıe alý kezinde kepil múlki jetispegen kásipkerler úshin oblystyq bıýdjetten 105 mln teńge kóleminde qarajat bólindi. Sonymen birge, kásipkerlik salasyn qarjylaı qoldaýǵa baǵyttalǵan «Damý-Aımaqtar» óńirlik baǵdarlamasyn iske asyrý úshin 1,4 mlrd teńge qarajat qarastyryldy. Budan bólek, aýylsharýashylyǵy salasynda da birshama sýbsıdııalar kózdelgen. Bıylǵy jyldyń ózinde, atalǵan salaǵa 7,8 mlrd teńge qarjy bólindi. Jalpy bıylǵy jyly oblysta shaǵyn jáne orta bıznesti damytýǵa 27 mlrd teńgeden astam qarajat bólingen.
Jıyn barysynda qala, aýdan ákimderi men tıisti sala basshylary oblysta kásipkerlikti damytý barysy týraly baıandamalar jasap, qatysýshylar tarapynan usynys-pikirler aıtyldy.
Esterińizge sala keteıik, aımaqta jappaı kásipkerlikti damytýǵa arnalǵan jıyn oblys ákimi Q.Kósherbaevtyń qatysýymen barlyq aýdandarda ótkizilgen bolatyn. Onda ár aımaqtyń áleýmettik-ekonomıkalyq erekshelikterine sáıkes jol kartasy ázirlenip, mańyzdy jobalardy qolǵa alý talqylandy.
