Qyzylordada jansaqtaý bóliminde koronavırýs juqtyrǵan náreste jatyr

QYZYLORDA. QazAqparat - Qyzylorda oblystyq kópbeıindi balalar aýrýhanasynda koronavırýsqa shaldyqqan ártúrli jastaǵy 59 bala em qabyldaýda, dep habarlaıdy QazAqparat tilshisi.

Emdeý ornynda sáýir aıynda 20 orynǵa laıyqtalǵan koronovırýs ınfektsııasy bólimshesi ashylǵan edi. Ol shildede indettiń órshýine baılanysty 90 orynǵa kóbeıtilgen.

«Óńirde qazir 1 jasqa deıingi sábıler arasynda da aýrý tirkelýde. Jansaqtaý bóliminde qazir 2 bala jatyr. Onyń biri - náreste bolsa, endi biri - jasóspirim bala. Naýqastar aýrýhanaǵa jaǵdaıy nasharlap, temperatýrasy 39-40-tan túspeı, entigýmen túsýde. Sondyqtan balalar aýyrmasyn desek, ata-analary ekpe alyp, saqtaný kerek. Sábılerdiń ımmýnıtetin túsirip almaı, kópshilik oryndarǵa jıi aparmaýy qajet», - dedi oblystyq kópbeıindi balalar aýrýhanasynyń pedıatr dárigeri Juldyz Qýatova.

Balalarǵa vırýs vaktsına saldyrmaǵan ata-anasynan juǵýda. Olar vaktsına saldyrmaýmen qatar sanıtarlyq normalardy saqtamaǵan, ıaǵnı kópshilik oryndarǵa barǵan. Ahýalǵa baılanysty kúsheıtilgen rejımde jumys jasalýda.

Eske salsaq, Qyzylorda oblysynda balalar arasynda koronavırýs ınfektsııasy órship barady.