Qyzylordada jańajyldyq shyrsha órtenip ketti

QYZYLORDA. QazAqparat - Qyzylorda qalasyna qarasty Tasbóget kentinde ornatylǵan jańajyldyq shyrsha órtenip ketti, dep habarlaıdy QazAqparat tilshisi.

112 qutqarý qyzmetine 1 qańtarda saǵat 2.01-de qala irgesinde ornalasqan Tabsóget kentinde jańajyldyq shyrsha janyp jatqany jóninde habarlama tústi.

«Atalǵan shaqyrtý boıynsha №4 órt sóndirý bóliminen 7 qyzmetker 1 tehnıkamen oqıǵa ornyna bardy. Órt 2.07-de oqshaýlanyp, 2.08-de tolyq sóndirildi. Órttiń shyǵýyna elektr symnyń qysqasha tuıyqtalýy sebep bolýy múmkin. Shyǵyn mólsheri anyqtalýda», - dep málim etti Qyzylorda oblystyq Tótenshe jaǵdaılar departamenti Órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.

Eske salsaq, budan buryn Qyzylordada kópqabatty úıdegi órtten 61 jastaǵy turǵyn kúıip qaldy.