Qyzylordada jańajyldyq bezendirýge 4,6 mln teńge jumsalady
QYZYLORDA. QazAqparat - Qyzylorda qalasynda jańa jyldyq bezendirý sharalaryna qalalyq bıýdjetten 4,6 mln teńge jumsalady, dep habarlaıdy QazAqparat tilshisi.
Búgin Qyzylorda qalasynda jańajyldyq shyrshanyń shamy jaǵyldy. Atalmysh shara barysynda Qyzylorda oblysynyń ákimi Qyrymbek Kósherbaev óz lebizin bildirdi. Syr óńiri jurtshylyǵyna tolaǵaı tabys tiledi. Jańajyldyq shyrshanyń shamyn jaǵý rásiminde ol qurmetke respýblıkalyq «Men qazaqpyn» megajobasynyń jeńimpazy Kúnsulý Túrikpen, paradzıýdodan 2018 jylǵy álem chempıonatynda altyn alǵan Oljas Orazalyuly ıe boldy.
Qala ákimdiginiń habaralýynsha, Jańa jyl merekesinde Qyzylorda qalasynda jyldaǵy dástúrge saı shyrsha tigý, bezendirý jumystary júrgiziledi. Merekelik shyrsha ortalyq alańnan bólek Jibek joly kóshesi, Temirjol vokzaly, Ǵ.Muratbaev atyndaǵy stadıon jáne Y.Jaqaev kóshesi boıynda boı kóteredi.
Qyzylorda qalasy ákimdigi baspasóz qyzmetiniń habarlaýynsha, Qyzylorda qalasyndaǵy Jibek joly dańǵyly, Jeltoqsan sekildi negizgi kóshelerdiń boıy, alleıalar jáne ortalyq alań sekildi kópshilik oryndar jańa jyldyq oıý-órnekter men ertegi keıipkerleri beınesinde svetodıotty bezendirýler, taqyryptyq úgit-nasıhat quraldary (bılbord) sekildi dúnıelermen tolyqtyrylady.
Jańa jyl merekesi qarsańynda túrli sharalar uıymdastyrý josparlanyp otyr. Sondaı-aq, jyldaǵy dástúrge saı 31 jeltoqsan kúni ortalyq alańda merekelik kontsert jáne otshashýlar uıymdastyrylady. Mereke qarsańynda turmysy tómen otbasylarǵa qamqorlyq kórsetýge de nazar aýdarylmaq.
