Qyzylordada jańartylatyn energııa kózderin paıdalanatyn elektr stantsııalary salynady
Búgin Qyzylorda oblysynyń ákimi Qýanyshbek Ysqaqov «Renovatio Group» kompanııasynyń quryltaıshysy Djeıms Kolter Iedı, EDPR kompanııasynyń ókili Dýarte Nýno Menedes da Kosta jáne «BDC Consulting KZ» kompanııasynyń dırektory Ahad Mahmýdovpen kezdesti.
Júzdesý barysynda oblysta jańartylatyn energııa kózderin paıdalanatyn elektr stantsııalaryn qurý jobalaryn iske asyrý maqsatyndaǵy memorandýmǵa qol qoıyldy.
Bul baǵytta júzege asatyn 200 MvT kún elektr stantsııasy qurylysynyń quny - 100 mln AQSh dollary. Bul maqsatta Qyzylorda qalasynyń sol jaǵalaýynan 400 gektar aýmaqta jer ýchaskesi tańdalǵan. Joba 2020 jyldyń aqpan aıynda bastalmaq. Bul - alǵashqy kezeńi. Al, bıylǵy jyldyń tórtinshi toqsanynda elektr stantsııasynyń qurylysy bastalady, ol 2021 jyldyń sońynda paıdalanýǵa beriledi dep kútilýde.
«Álemde qalyptasqan kúrdeli ekonomıkalyq jaǵdaıǵa baılanysty óńirlik saýda-ekonomıkalyq yntymaqtastyqty keńeıtýdiń mańyzy zor. Eki jaqty jumystyń nátıjesinde sońǵy 5 jylda Qazaqstannyń Portýgalııamen ózara saýdasy 2,3 mlrd. AQSh dollaryna jetken. Bul rette sizderdiń Qyzylorda oblysyn ınvestıtsııa tartý sektory retinde tańdaǵandaryńyz úshin qýanyshtymyz. Aımaqta tabıǵı resýrstar sany jeterlik. Oblystyń jer qoınaýynda Mendeleevtiń kestesindegi kóptegen elementter bar», - dedi oblys ákimi Q.Ysqaqov.
Óńirde jańartylatyn elektr energııasynyń kózderin damytýǵa jumys jasalýda. Oblys - kún kózi aıryqsha túsetin aýmaqtardyń biri. Máselen, oblystaǵy kún sáýlesiniń ortasha jyldyq uzaqtyǵy 3 myń saǵattan artyq. Bul - kún elektr stantsııalaryn salý jáne damytý úshin úlken múmkindik.
Qazirgi tańda ulybrıtanııalyq, frantsııalyq jáne bolgarııalyq ınvestorlardyń qatysýymen oblysta energııa kózderi boıynsha 3 joba iske asyrylýda.
