Qyzylordada Jańa jyl qarsańynda 60 páterli turǵyn úı paıdalanýǵa berildi
QYZYLORDA. QazAqparat - Qyzylordada Jańa jyl qarsańynda paıdalanýǵa berilgen 60 páterli turǵyn úıden bıýdjettik uıym qyzmetkerleri, kezekte turǵandar men kópbalaly otbasylar páter kiltin aldy, dep habarlaıdy QazAqparat tilshisi.
Oblys ákimi Qyrymbek Kósherbaev jańa páter ıelerin kele jatqan jańa jylmen quttyqtady. Sońǵy jyldary aımaqta kóptegen áleýmettik jáne bıznes-nysandar, turǵynúıler men ónerkásip orny salynǵanyn atap ótti.
«Tek osy jyldyń ózinde qarjylandyrýdyń barlyq kózi esebinen oblys ortalyǵynda 402 myń sharshy metrge jýyq turǵyn úı el ıgiligine aınaldy. Búgingi kúni qalada 2052 páterge arnalǵan 46 kópqabatty úı, onyń ishinde 1272 páterge arnalǵan 31 úı - jeke ınvestorlar esebinen salynýda. Qýanyshtaryńyz qutty bolsyn», - dedi aımaq basshysy.
Jańa úıdiń kiltin alǵan Batyr ana Bıbiaıym Álibekova oblys ákimine rızashylyǵyn jetkizdi.
Aıta keteıik, 60 páterli úıdiń jalpy aýdany-4 085 sharshy metrdi quraıdy.
