Qyzylordada jańa taý-ken baıytý kombınatynyń irgetasy qalandy
Joba Eýropalyq qaıta qurý jáne damý bankimen qarjylandyrylady. Ol Indýstrııalandyrý kartasynyń ekinshi besjyldyǵy aıasynda iske asyrylýda. Tolyq iske qosylǵannan keıin kásiporynda jylyna 4 mln tonnaǵa deıin ken óndiriledi.
Atalmysh sharaǵa «Samuryq-Qazyna» ulttyq ál-aýqat qory» AQ basqarma tóraǵasynyń orynbasary Alık Aıdarbaev pen Qyzylorda oblysynyń ákimi Qyrymbek Kósherbaevpen qatysty. Shara barysynda Qyzylorda oblysy ákimdigi, «Shalqııa Tsınk LTD» AQ jáne «Dobersek» nemis kompanııasy arasynda ózara yntymaqtastyq týraly úshjaqty memorandýmǵa qol qoıdy.
«Atalǵan joba Memleket basshysynyń qoldaýymen júzege asyrylǵanyn atap ótkim keledi. Jobany iske asyrý Syr óńiriniń ekonomıkasyn damytý ǵana emes, respýblıka ekonomıkasyn damytýǵa qyzmet etetin bolady», - dedi oblys ákimi Q. Kósherbaev.
Aıta ketsek, 2016 jyldyń mamyr aıynan bastap ken ornynda ken baıytý kombınatynyń qurylysyna daıyndyq jumystary bastalǵan bolatyn. «Shalqııa» ken ornynda ken baıytý kombınatynyń qurylysy jobasy Indýstrııalandyrý kartasynyń ekinshi besjyldyǵy aıasynda júzege asyrylýda. Joba quny - 650 mln AQSh dollary.
Kásiporynda qurylys kezeńinde 1,0 myńǵa jýyq, al iske qosylǵannan keıin 1500-den astam jańa jumys orny qurylatyn bolady.
Kásiporyn kendi vertıkaldy-konveıerlik ádispen baıytý jáne óndirý boıynsha ınnovatsııalyq ádisti qoldanady. Atap ótý qajet, aǵymdaǵy jyly 2 qazanda London qalasynda «Taý-Ken Samruq» AQ jáne «Dobersek» nemis kompanııasy arasynda «Shalqııa» ken ornynda ken baıytý kompanııasynyń qurylysyn júrgizý týraly ERS-kelisimge qol qoıyldy.
Shalqııa - JORC klassıfıkatsııasy boıynsha kólemi álemde dáleldengen jáne yqtımal qorlar boıynsha 5 oryndaǵy jáne myrysh qory 6,5 mln. tonnany quraıtyn qorǵasyn-myryshty ken orny bolyp tabylady. Sonymen qatar, BrookHunt zertteýshi kompanııasynyń málimeti boıynsha Shalqııa ken ornyndaǵy myrysh qory Qazaqstan Respýblıkasyndaǵy barlyq myrysh qorynyń 30% quraıdy. Atalǵan ken ornyn ıgerý myrysh naryǵynda iri kompanııalardyń biri bolýǵa jáne úlken kólemde qorǵasyn óndirýge múmkindik beredi.
