Qyzylordada jańa shaǵyn aýdan paıdalanýǵa beriledi
ASTANA. QazAqparat - Qyzylorda oblysynda shaǵyn aýdan paıdalanýǵa berilmek. Bul týraly oblys ákimi Qyrymbek Kósherbaev OKQ-de ótken baspasóz máslıhatynda málim etti, dep habarlaıdy QazAqparat tilshisi.
«Elbasynyń bes áleýmettik bastamasyna sáıkes búginde oblys aýmaǵynda 1 747 páterlik ıaǵnı 69 kóppáterli turǵyn úıdiń qurylysy júrgizilýde. Keminde 55-in bıyl iske qosamyz, olardyń qatarynda Syrdarııanyń sol jaǵalaýyndaǵy 14 kóppáterli turǵyn úıden quralatyn tutas shaǵyn aýdandy paıdalanýǵa berýdi josparlap otyrmyz», -dedi aımaq basshysy.
Budan bólek, oblys ákiminiń aıtýynsha, 2013 jyldan bastap qolǵa alynǵan aımaqtaǵy apatty jaǵdaıdaǵy kezekte turǵan úı ıeleriniń máselesi 2017 jyly oń sheshimin tapty. Búgingi tańda óńir boıynsha apatty jaǵdaıdaǵy úılerdiń ornyna 645 otbasy úshin jańa jaıly baspana salyndy.
«Sońǵy 3 jylda jeke turǵyn úı qurylysy sheńberinde 24 myńnan astam jer ýchaskesi ınjenerlik ınfraqurylymmen qamtamasyz etildi. Nátıjesinde, tek 2017 jyldyń ózinde turǵyndardy baspanamen qamtý 17%-ǵa jýyq, al, 2018 jyldyń 9 aıynda taǵy 4%-ǵa ósti», - dedi ol.
