Qyzylordada jańa oqý jylynda 102 oqýshy koronavırýs juqtyrdy
Óńirde barlyǵy 316 jalpy bilim beretin mekeme bar. Onyń barlyǵy Qyzylorda oblysynyń sanıtarııalyq-epıdemıologııalyq baqylaý departamenti baqylaýyna alynǵan.
Ótken 2020-2021 oqý jylynda oqýshylar arasynda qaterli indet juqtyrýdyń 482 jaǵdaıy tirkelgen bolatyn.
Onyń 58% úıden oqytylatyn naýqas oqýshylar arasynda kórinis berse, 42% oflaın rejımde oqyǵan balalar arasynda anyqtaldy.
«Bıylǵy jańa oqý jylynyń toǵyz kúninde 102 oqýshy indetke shaldyqqan. Onyń ishinde 92-i mekteppen baılanysty emes, jazǵy demalys ýaqytynda úı oshaǵyndaǵy qarym-qatynas arqyly juqtyryp, úı karantınine oqshaýlanǵan oqýshylar. Al qalǵan 10-y bilim alýdy offlaın formatta bastaǵan balalar arasynda tirkeldi. Osyǵan baılanysty qarym-qatynasta bolǵan adamdar sheńberi anyqtalyp, 13 synyp oqýshylary 14 kúnge úı karantınine jiberildi», - dedi oblystyq sanıtarııalyq-epıdemıologııalyq baqylaý departamentiniń bólim basshysy Almash Shýaqbaeva.
Byltyrǵy oqý jylynda óńirde 76 mektepte koronavırýs juqtyrý jaǵdaıy tirkelgen bolatyn.
Saldarynan mektepterdiń zaqymdaný kórsetkishi 25,4% dy quraǵan edi.
Al bıylǵy jańa oqý jylynyń 9 kúninde 10 mektepten koronavırýs kórinis berip, zaqymdaný kórsetkishi 3,2% qurady.
Eske salsaq, budan buryn Qyzylordada karantınge qaramastan ótip jatqan 4 toı tarqatylǵan bolatyn.