Qyzylordada «Jańa gýmanıtarlyq bilim. Qazaq tilindegi 100 jańa oqýlyq» atty shara ótti
QYZYLORDA. QazAqparat - Qyzylorda oblysy ákimdiginiń uıymdastyrýymen «Jańa gýmanıtarlyq bilim. Qazaq tilindegi 100 jańa oqýlyq» atty shara ótti, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Atalmysh sharaǵa oblys ákimi Qyrymbek Kósherbaev, «Ulttyq aýdarma bıýrosynyń» atqarýshy dırektory Raýan Kenjehanuly qatysty.
Oblys ákimi Memleket basshysynyń «Bolashaqqa baǵdar: rýhanı jańǵyrý» atty baǵdarlamalyq maqalasy el úshin Rýhanı silkinis jasaǵan tyń bastama bolǵanyn jetkizdi.
«Rýhanı jańǵyrý» baǵdarlamasyndaǵy mańyzdy baǵyttardyń biri - «sananyń ashyqtyǵy». Osy maqsatta talantty da talapty balalarymyzdyń zamanaýı bilimdi ıgerýi, órkenıet talaptaryna saı bolýy úshin barynsha jaǵdaı jasalýda. Byltyr baǵdarlamanyń ishindegi «100 jańa oqýlyq» arnaıy jobasy boıynsha Memleket basshysy Nursultan Nazarbaevtyń usynysymen respýblıkada «Ulttyq aýdarma bıýrosy» qoǵamdyq qory qurylǵany belgili. Búgingi kúni qoǵamdyq qor gýmanıtarlyq ǵylym salasyndaǵy úzdik 100 oqýlyqty tańdap, olardy qazaq tiline aýdaryp jatyr. Alǵashqy 18 kitap oqyrman qolyna tıdi», - dedi oblys ákimi.
Atalmysh joba boıynsha 300-den asa adam jumys jasaýda. Atap aıtqanda, ǵalymdar, oqytýshylar, aýdarmashylar, betteýshiler, kontent jasaýshylar, programmıster.
Óz kezeginde «Ulttyq aýdarma bıýrosynyń» atqarýshy dırektory Raýan Kenjehanuly basty maqsat - barlyq kitaptardy óz betimen aýdaryp shyǵarý emes, osy jobaǵa atsalysatyn ortany jumyldyrý ekenin aıtty.
"Ony jekelegen uıym óz betimen atqara almaıdy. Óıtkeni, aýdarma - kúrdeli de aýqymdy shyǵarmashylyq jumys. Aýdarma jumysy bastalmas buryn, barlyq joǵary oqý oryndarynan zárý, mamandyqqa qajetti oqýlyqtarǵa suraý salynǵan. 800-den astam oqýlyqtyń tizimi irikteldi. Al, aýdarylatyn oqýlyqtarǵa qoıylatyn talaptyń biri - ol belgili bir ıdeıalardan beıtarap bolý. Osy jáne taǵy birneshe qoıylǵan krıterııler negizinde 18 oqýlyq iriktelip alyndy. Árqaısysy 10 myń danamen shyǵarylǵan kitaptar, búginde oqý oryndary men kitaphanalarǵa tegin taratyldy», - dedi ol.
Atalmysh shara barysynda qatysýshylar tarapynan san alýan saýaldar qoıyldy. Oǵan «Ulttyq aýdarma bıýrosynyń» atqarýshy dırektory Raýan Kenjehanuly, «Ulttyq aýdarma bıýrosynyń» redaktsııalyq alqa múshesi Sherýbaı Qurmanbaıuly jan-jaqty jaýap berdi.
