Qyzylordada jalǵan sertıfıkat berýmen aınalysyp kelgen aýmaqtyq ınspektsııa qyzmetkeri 7 jylǵa sottaldy
ASTANA. 10 maýsym. QazAqparat /Aıdar Ospanalıev/ - Qyzylordada jalǵan sertıfıkat berýmen aınalysyp kelgen aýmaqtyq ınspektsııa qyzmetkeri ustaldy.
Ekonomıkalyq qylmysqa jáne sybaılas jemqorlyqqa qarsy kúres agenttiginiń málimetterinshe, Qyzylorda oblysynyń qarjy polıtsııasynyń qyzmetkerleri Aýyl sharýashylyǵy mınıstrliginiń Agroónerkásiptik keshendegi memlekettik ınspektsııasy Shıeli aýdandyq aýmaqtyq ınspektsııasy bóliminiń bastyǵy Ó.Baıbolatovqa qatysty qylmystyq isti tergeýdi aıaqtady. Ol N. esimdi azamattan Shıeli aýdanynda satyp alynǵan iri qara maldy basqa aýmaqqa alyp shyǵýǵa qajetti sertıfıkatty alý úshin turaqty túrde aqsha berip turýyn talap etken. Departament qyzmetkerlerimen júrgizilgen jedel is-sharalar barysynda ol 12 myń teńge para alý ústinde ustaldy.
Sonymen qatar ol qyzmet ókilettigin paıdalanyp, qyzmettik jalǵandyq jasaý arqyly, naqtyraq aıtqanda jalǵan sertıfıkat berýmen aınalysqan.
Osyǵan qaraı Qyzylorda oblysy, Shıeli aýdandyq soty Ó.Baıbolatovty qyzmet ókilettigin teris paıdalaný, qyzmettik jalǵandyq jasaý áreketteri boıynsha kináli dep taýyp, 3 jyl merzimge memlekettik qyzmette laýazymda bolý quqyǵynan aıyra otyryp, 7 jylǵa bas bostandyǵynan aıyryp múlkin tárkileý jóninde úkim shyǵardy.
