Qyzylordada jalǵan sanıtarlyq kitapsha jasaý deregi anyqtaldy
Bul boıynsha jınaqtalǵan qujattar Sybaılas jemqorlyqqa qarsy is-qımyl ulttyq bıýrosynyń Qyzylorda oblysy boıynsha departamentine joldandy, dep habarlaıdy QazAqparat tilshisi.
Atalmysh derek «Aqmeshit - adaldyq alańy» jobalyq keńsesi aıasynda júrgizilgen monıtorıng sharasy barysyna anyqtalǵan. Joba músheleri oblys ortalyǵyndaǵy medıtsınalyq uıymdarda. oblystyń Shıeli, Jańaqorǵan, Syrdarııa, Qarmaqshy aýdandaryndaǵy emhanalarda qoǵamdyq monıtorıng jumystaryn júrgizgen.
«Monıtorıng nátıjesimen jobalyq top músheleri shynaıylyǵy kúmán týdyratyn 50-den astam №086 úlgisindegi anyqtamalar alyndy. Atalǵan qujattar boıynsha, protsessýaldyq sheshim qabyldaý úshin olar polıtsııa organdaryna joldandy», - dedi «Aqmeshit - adaldyq alańy» jobalyq keńsesiniń jetekshisi Jandos Tusmaǵambetov.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentiniń basqarma basshysy Baǵdat Іzkenov bul baǵytta atqarylatyn jumystar jalǵasa beretinin jetkizdi.
«Oblysta «Aqmeshit - adaldyq alańy» jobalyq keńsesi ashylyp, turmystyq jemqorlyqty joıý men onyń aldyn alý baǵytynda nátıjeli jumystar júrgizip keledi. Joba aıasynda azamattardyń kúndelikti tynys-tirshiligimen tyǵyz baılanysty bolatyn densaýlyq saqtaý, bilim, áleýmettik qamtý, sáýlet, qurylys, kommýnaldyq sharýashylyq, aýyl sharýashylyǵy, jer qatynastary, salyq jáne quqyq qorǵaý organdarynda joba boıynsha jumystar júrgizildi», - dedi Baǵdat Іzkenov.