Qyzylordada jalǵan aqsha jasaǵandar bas bostandyǵynan aıryldy
QYZYLORDA. QazAqparat - Qyzylorda oblysynda jalǵan aqsha jasap, qolǵa túsken qylmystyq topqa qatysty sot úkimi shyqty, dep habarlaıdy QazAqparat tilshisi.
Qylmystyq top quramynda eki adam bolǵan. Olardyń biri 2017 jyldan beri qundylyǵy 10 myń teńgelik jáne 100 dollarlyq banknottardy jasaýmen aınalysqan. Ony bazarlarda, saýda dúkenderine ótkizip kelgen. Tergeý barysynda Qyzylorda qalasyndaǵy saýda dúkeni, dámhana, janarmaı beketi, ózge de sharýashylyq nysany jáne azamattarǵa jalǵan aqshany ótkizý jaǵdaıy kezdeskeni belgili boldy.
Al qylmystyq toptyń taǵy bir múshesi atalmysh qoldan jasalǵan banknottardy saqtaǵan. Olardy ótkizýge qatysqan.
«Olar jalǵan 10 myń teńgelik 143 dana jáne 100 AQSh dollaryn salyp kólikpen shyqqan kezekti saparynda qolǵa tústi. Olardyń jalǵan aqshalardy ótkizý jaǵdaılary sot saraptamasy jáne kýágerlerdiń dálelimen naqtylandy. Barlyq áreketi belgili boldy», - dedi Qyzylorda oblysy boıynsha Memlekettik kirister departamentiniń bas mamany Baqyt Ordanova.
Qyzylorda qalalyq №2 sotynyń úkimimen olardyń áreketteri Qazaqstan respýblıkasy Qylmystyq kodeksiniń 231-babynyń 2-bóligi 1,2,3 tarmaqtary boıynsha dáleldenip, kináli dep tanyldy. Jalǵan aqsha jasaýshylar 5 jyl 3 aıǵa bas bostandyǵynan aıryldy. Jazasyn qaýipsizdigi joǵary mekemede óteıtin boldy.
Budan buryn Qyzylordada zańsyz oıyn bıznesin uıymdastyrǵandar jazalanǵanyn habarlaǵan edik.
