Qyzylordada jalǵan aqsha jasaǵan Ózbekstan azamaty sottaldy
QYZYLORDA. QazAqparat - Qyzylorda qalasynda jalǵan aqsha jasaǵan 22 jastaǵy qyzylordalyq jáne 24 jastaǵy ózbekstandyq azamat bas bostandyǵynan aıryldy, dep habarlaıdy QazAqparat tilshisi.
Bul qylmystyq oqıǵa Qyzylorda qalalyq №2 sotynda qaraldy. Eki jigit zańsyz banknottardy túrli-tústi prınterdiń kómegimen jasap otyrǵan. Olardyń zańsyz áreketi alysqa uzaǵan joq. Jalǵan aqsha jasaýshylar tártip saqshylarynyń qolyna túsip, sot aldyna keldi.
Atalmysh sot protsesi úsh aıǵa sozylǵan. Sot barysynda olar 5 myń teńgeniń naq kóshirmesin ınternet arqyly tapqanyn aıtady. Ony káde syı retinde shyǵarǵanyn aıtyp aqtaldy. Degenmen ony sot negizsiz dep tapty.
«Kúdiktilerdiń buryn sotty bolmaǵany eskerildi. Olardyń ekeýine de bes jyl bas bostandyǵynan aıyrý jazasy taǵaıyndaldy», - dedi Qyzylorda qalasy №2 sotynyń sýdıasy Balǵabaı Jańabaev.
Endi olar jazasyn qylmystyq atqarý júıesiniń ortasha qaýipsiz mekemesinde óteıdi.
