Qyzylordada jaqynda júzge tolǵan polkovnık qaıtys boldy
QYZYLORDA. 25 sáýir. QazAqparat - Qyzylorda qalasynda jasy jaqynda ǵana júzge tolǵany keń kólemde atalyp ótken soǵys jáne eńbek ardageri, otstavkadaǵy polkovnık, jýrnalıst Súleımen Seıitov qaıtys boldy.
Kezinde Uly Otan soǵysyna qatysyp, maıdan dalasynan polkovnık sheninde oralǵan Súleımen aǵa uzaq jyl baqytty da mándi ómir súrdi. Ol Qazaqstannyń úsh óńiriniń - Aqtóbe, Aqmola jáne Qyzylorda oblystarynyń gazetterin basqardy. Zeınet demalysyna Qyzylorda oblystyq polıgrafııa jáne baspa isteri jónindegi kombınattyń dırektory qyzmetinen shyqty. Sodan keıin de oblys ómirine belsene aralasty.
Taıaýda ǵana búkil oblys jurtshylyǵy aıtýly ardagerdiń jasy júzge tolǵanyn atap ótip edi. Endi, mine, ǵasyr jasyna jetken aqsaqal baqılyqqa da attanyp bara jatyr. Ol ózi bastan-aıaq qatysyp, jalaýyn jelbiretken jeńistiń 67 jyldyq merekesine sanaýly kúnder ǵana jete almaı qaldy. Ardagerdi aqtyq saparǵa shyǵaryp salýǵa arnalǵan qaraly jıyn oblys ortalyǵyndaǵy «Taǵzym» alańynda ótti. Ony oblys ákimi sóz sóılep ashty. Jıynda sondaı-aq oblys ardagerleri keńesiniń tóraǵasy Seıilbek Shaýhamanov, marqumnyń áıeliniń sińlisi Alma Aqdaýletova, eńbek ardageri Sámıt Daldabaev jáne basqalar shyǵyp sóıledi.
Sońynan «Altynshash» restoranynda marqumnyń rýhyna arnalǵan as berildi.
