Qyzylordada «Jaqaev izbasarlary» eńbek lageri júmys isteıdi
QYZYLORDA. QazAqparat - Syr óńirinde qurylǵan «Jaqaev izbasarlary» eńbek lageri jastary sońǵy býyn ókilderine ónegeli isti dáriptep keledi. Olardyń negizgi maqsaty - jastardy aýylda eńbek etýge shaqyrý, dep habarlaıdy QazAqparat tilshisi.
Eńbek lageri óńirdegi túrli oqý oryndarynyń stýdentterinen jasaqtalǵan. Jastar aýyldyq jerlerde taza eńbek maıdanyna nazar aýdaryp, qarapaıym dıqan qaýymynyń tynys-tirshiligine zer salady.
«Jaqaev izbasarlary» bul joly Qarmaqshy aýdany Aqtóbe aýylynda boldy. Ónegeli isti dáripteý jolynda júrgen órender aýyl ómirine nazar aýdaryp qaıtty. Shara barysynda olar qazaqtyń ulttyq salt-dástúrin de ulyqtaı tústi. Keshqurym bastańǵy jasap, onda dástúrimizdi dáriptedi. Onda dombyradan kúmbirlete kúı tógip, ásem áýen shyrqaldy.
Eldegi aǵaıynnyń kúndegi ádetimen tań atysymen eńbek lageri jastary dala qosyna attandy. Dala qosynda birden qyzý eńbekke kirisip ketti. Egis dalasynda qolyna oraq ustaǵan qyz-jigitter birden-aq qyzý sharýaǵa moıyn burdy. Bul - aýyldaǵy «Aqtóbe» JShS qarasty egis alqabynda bolyp jatqan kórikti kórinis. «Jaqaev izbasarlary» quramynda 30-ǵa jýyq jas bar.
«Shynyn aıtqanda, qazir jastar aýylda jumys jasaýǵa qulyq tanyta bermeıdi. Biz osyndaı isimiz arqyly olardy týǵan topyraqty túletýge shaqyrsaq deımiz. Búginde olar zańger, qarjyger jáne basqa da mamandyq ıeleri bolǵysy keledi. Biz jastardy agrarlyq salaǵa tartýymyz tıis. Olardyń aldynda eńbek maıtalmandaryn osylaısha dáripteı túskenimiz artyq emes. Búgingi sharadan baıqaǵanymyz - jastardyń eńbek etýge ynta-jigeri zor. Búginde aýyldardyń jaǵdaıy jaqsaryp keledi. Aýyz sý, jaryq máseleleri tolyqtaı sheshilgen. Sondyqtan qala men aýyldyń aıyrmashylyǵyn baıqaý qıyn túsedi. Jastardy aýylda eńbek etýge shaqyramyz», - dedi Qarmaqshy aýdandyq jastar resýrstyq ortalyǵynyń dırektory Ádil Ibrahım.
Sharýashylyqtyń 67-jastaǵy bas agronomy Sapar Elemesov jastarǵa egis dalasy jaıynda áńgimelep berdi. Eńbek jasaǵy kelgen alqapta Irannyń taromo-hoshemı kúrish sorty egilgen eken. Eńbek jasaǵy taromo-hoshemı sorty arasyndaǵy qyzyl kúrishti julyp tastady. Olardy arnaıy jerde jınap, joıýǵa nazar aýdardy.
Jastar aldynda seriktestik dırektory Nurlan Іzdibaev eginshiler ómiri jaıynda áńgimelep berdi. Qazirgi tańda sharýashylyq sapaly ónim shyǵarýǵa mán berip keledi. Sonyń nátıjesinde eksportqa shyǵarý máselesi jolǵa qoıyla bastady. Eńbekshiler 100-120 myń teńge aralyǵynda jalaqy alady.
Eńbek jasaǵy aýylda úsh kún boıy eldegiler tynys-tirshiligimen tanysty. Bul shara aýyldyq mádenıet úıindegi arnaıy shara,a ulasty. Onda arnaıy nomınatsııalar boıynsha jastar marapattaldy.
Foto:kyzylorda-news.kz
