Qyzylordada jabaıy ańdardy jón-josyqsyz qyrǵan qaskóıler ustaldy
QYZYLORDA. QazAqparat-Ekologııalyq qylmystar men quqyqbuzýshylyqtardy eskertý, anyqtaý maqsatynda Jergilikti polıtsııa qyzmeti jáne Qyzylorda oblystyq orman sharýashylyǵy jáne janýarlar dúnıesi aýmaqtyq ınspektsııasy qyzmetkerleriniń birlesip júrgizgen reıdtik jumystary barysynda zańsyz ań aýlaǵandar ustaldy. Bul týraly QazAqparat tilshisi oblystyq ІІD silteme jasap habarlady.
Jaqynda Jańaqorǵan aýdany, Jaıylma aýylynyń 7-8 shaqyrymdaı jerde jaryqtandyrǵysh shamyn jaǵyp kele jatqan ÝAZ markaly avtokóligi toqtatylyp, tekserý barysynda avtokóliktiń ishinen 14 atylǵan qoıan jáne 1 kúzen ańynyń denesi anyqtaldy. Budan bólek kóliktiń ishinen 12 kalıbrli jáne 32 kalıbrli ańshy myltyǵy, myltyq oqtary aıǵaq zat retinde alyndy.
Oqıǵa ornynda avtokólikte bolǵan Súttiqudyq aýylynyń 6 turǵyny ustalyp, ańshylyq jasaýǵa ruqsat etetin qujattary bolmaǵandyǵy anyqtaldy.
Atalǵan derek Qazaqstan Respýblıkasy Qylmystyq kodeksiniń 337-baby 1-bóligimen Sotqa deıingi tergep-tekserýdiń biryńǵaı tizilimine tirkelip, qazirgi tańda Jańaqorǵan aýdandyq ishki ister bólimimen tergeý amaldary júrgizilýde.
Dál osyndaı derek 13 qyrkúıek kúni de tirkelgen. Qyzylorda oblystyq orman sharýashylyǵy jáne janýarlar dúnıesi aýmaqtyq ınspektsııasyna belgisiz bir azamat habarlasyp, qaraquıryq ańyna uqsas janýardyń denesin belgisiz bireýler tasymaldap júrgendigin habarlaǵan. Oqıǵa ornyna arnaıy jasaqtalǵan top jiberilip, tekserý barysynda qapqa salynǵan Qyzyl kitapqa engizilgen 1 qaraquıryq ańynyń denesin anyqtaıdy.
Atalǵan derek boıynsha, Qazaqstan Respýblıkasy Qylmystyq kodeksiniń 337-baby 4-bóligi boıynsha qylmystyq is qozǵalyp, Shıeli aýdandyq ishki ister bólimimen sotqa deıingi tergep-tekserý amaldary júrgizilýde.
