Qyzylordada Zeınep Ahmetovanyń qatysýymen Analar keńesiniń forýmy ótti
QYZYLORDA. QazAqparat - Búgin Dostyq úıinde Qazaqstan halqy assambleıasy Qyzylorda oblystyq Analar keńesiniń «Dástúrli qundylyqtar jáne rýhanı jańǵyrý» atty forýmy ótti, - dep habarlady QazAqparat tilshisi.
Oǵan jazýshy-etnograf, qoǵam qaıratkeri, Baýyrjan Momyshulynyń kelini, qazaqy dástúrlerdi, otbasylyq qundylyqtardy, dástúrli dindi, ulttyq rýhty nasıhattaýshy Zeınep Ahmetova, oblys ákiminiń orynbasary Rýslan Rústemov, oblystyq, aýdandyq Analar keńesiniń músheleri, ınternatsıonal otbasylar, kópbalaly analar men etnomádenı birlestik músheleri, muǵalimder, qala turǵyndary jáne BAQ ókilderi qatysty.
Sharany oblys ákiminiń orynbasary R.Rústemov júrgizedi. Forýmnyń mańyzdylyǵyn atap, Z.Ahmetovanyń ónegeli ómir jolyna toqtalyp ótti.
Zeınep Asqarbekqyzy qan maıdanda áıgili komandırlerdiń biri bolǵan, gvardııa polkovnıgi Baýyrjan Momyshulynyń soǵystan keıingi jyldaryndaǵy ómirine arnalǵan estelik-kitap «Shýaqty kúnderdiń» jáne «Ázilińdi saǵyndyq», «Babalar amanaty» kitaptarynyń avtory.
Forým barysynda Zeınep Asqarbekqyzy otbasylyq qundylyqtar, dástúrli din, ulttyq salt-dástúr, qazaq qyzyna tán bolmys, qoǵam qalyptasýyndaǵy ana-áje róli týraly áńgime aıtyp, qatysýshylardyń suraqtaryna jaýap berdi. Sondaı-aq, ata men kelinniń arasyndaǵy baılanysty, qataldyq artyndaǵy jumsaqtyqty, taıaqtyń ushyndaǵy tárbıe máselelerine toqtala ketti. Batyrdyń kelini bolý - úlken jaýapkershilik pen uqyptylyqty talap etkendigin de aıtyp ótti.
Aıta ketý kerek, dana kelin, dara kelin Zeınep Asqarbekqyzyn kórýge kelýshiler qatary kóp boldy. Ǵıbratty áńgimelerin tyńdap, ónegeli ósıetterin oılaryna túıdi. Forým pikir-almasý, suraq-jaýappen jalǵasyn tapty.
