Qyzylordada zańsyz oıyn bıznesine qatysty bes qylmystyq iske úkim shyqty
Bul qylmystyq ister Qyzylorda oblysy boıynsha ekonomıkalyq tergep-tekserý departamenti tarapynan júrgizildi.
Alǵashqy qylmystyq iste Qyzylorda qalasynyń 58 jastaǵy turǵyny tartylǵan.
Ol bıylǵy jyldyń shilde-tamyz aılarynda paıdakúnemdik nıetpen zańsyz oıyn bıznesin uıymdastyrǵan.
Sol maqsatta jalǵa páter alyp, 6 kompıýter qurylǵysyn ornatyp, bás tigý jolymen qumar oıyndaryn oınatqany anyqtaldy.
Sondaı-aq, qalanyń taǵy bir aýdanynda jalǵa alǵan ǵımaratta taǵy bir azamat 15 dana kompıýter qurylǵysyn ornatyp, ǵalamtor jelisin paıdalaný arqyly ınternet-kazıno qumar oıynyn oınatqan.
Al osy jaz aılarynda 42 jastaǵy turǵyn Qaramanov kóshesinen jalǵa alǵan meken jaıda ǵalamtor jelisin paıdalanyp «superomatic», onyń ishinde «rýletka», «poker», «blek djek» oıyndaryn oınatýmen aınalysqan.
Oǵan qosa bir azamatsha jalǵa alǵan eki qabatty ǵımaratqa 30-dana protsessor men 17-dana monıtor ornatyp zańsyz qyzmetin bastasa, Qazbek Sársembekov atty qala turǵyny da 10 kompıýtermen 6 aı boıy osyndaı zańsyz jumyspen aınalysyp kelgen. Tergeý kezinde beseýiniń de kúndelikti eńbek aqy tólep, operator-kassırlerdi jumysqa alǵany belgili boldy.
«Atalǵan azamattardyń oınatqan oıyn túrleri sot kompıýter-tehnologııalyq sarapshylar qorytyndysymen tolyq rastaldy. Qylmystyq áreketteri olardyń moıyndaýymen, kýágerler jaýabymen jáne jasyryn baqylaý hattamasymen tolyq dáleldendi. Qyzylorda qalalyq №2 soty atalǵan azamattardy QR Qylmystyq kodeksiniń 307-baby 1-bóligimen kináli dep tanydy. Olardyń úsheýi 200 saǵatqa qoǵamdyq jumystarǵa tartý jazasyn taǵaıyndady. Al A.ekeýine 200 (eki júz) aılyq eseptik kórsetkish mólsherinde – 612 600 (alty júz on eki myń alty júz) teńge aıyppul jazasy taǵaıyndaldy. Sondaı-aq,bes oıyn orynynan alynǵan 66 dana protsessor, 57 dana monıtor, 6 modem, 3 hab jáne kassadan alynǵan 156420 teńge aqsha qarajaty memleket paıdasyna kiristelgen», - dedi oblys boıynsha ekonomıkalyq tergep-tekserý departamentinen.
