Qyzylordada zańsyz oıyn bıznesin uıymdastyrǵandar jazalandy
QYZYLORDA. QazAqparat - Qyzylordada zańsyz oıyn bıznesin uıymdastyrǵan jergilikti 3 turǵyn jazaǵa tartyldy, dep habarlaıdy QazAqparat tilshisi.
Qyzylorda oblysy boıynsha Memlekettik kirister departamenti ekonomıkalyq tergeý qyzmeti mamandary atalmysh zańsyz oıyn bıznesiniń jolyn kesti. Olar uzaq ýaqyt boıy baqylaý júrgizdi. Nátıjesinde jedel-izdestirý sharasy uıymdastyryldy. Qylmystyq top 2017-2018 jyldarda óz áreketin júzege asyrǵan. Qalanyń birneshe jerinde oıyn núktesi anyqtalǵan.
Barlyq oıyn núktelerinen 16 kompıýter, 14 teledıdar, birneshe termoprınter men elektrondy qalamdar tárkilendi. Al kassalardan qomaqty aqsha tabyldy.
Oıyn bıznesinen ońaı jolmen paıda izdegender aldymen bul tirshiligin Almaty qalasynda bastasa, ony beride Qyzylordaǵa aýystyrǵan.
«Atalmysh qylmystyq is Qyzylorda qalalyq №2 sotynda qaraldy. Ol tolyǵymen dáleldendi. Aıyrtaýshy prokýrordyń olardyń áreketi Qazaqstan Respýblıkasy Qylmystyq kodeksiniń 307-babynyń 2-bóligi 2-tarmaǵymen sáıkes keletindigin saralady», - dedi oblys boıynsha Memlekettik kirister departamentiniń baspasóz qyzmetiniń mamany Baqyt Ordanova.
Sot úkimimen eki azamatqa 567 250 teńge kóleminde aıyppul salyndy. Buryn sotty bolǵan bireýi 4 jylǵa bas bostandyǵynan aıyrylyp, jazasyn qylmystyq atqarý júıesiniń qaýipsizdigi barynsha joǵary mekemesinde óteıtin boldy.
Budan buryn Qyzylordada baspahanada jalǵan aqsha jasaǵan turǵynnyń sottalǵanyn habarlaǵan edik.
