Qyzylordada zańsyz qyzmet kórsetken tehnıkalyq baıqaý beketi anyqtaldy
Avtomobıl kóligi týraly zańnamaǵa sáıkes, respýblıkalyq jáne oblystyq mańyzy bar qalalarda mindetti tehnıkalyq baıqaýdy tek qana statsıonarlyq jeliler júzege asyrady. Mobıldi jeliler qaladan tys jerde jumys isteý úshin jabdyqtalǵan jáne tek qana jeńil avtokólik quraldaryn tehnıkalyq tekserýge arnalǵan.
Belgilengen talaptardy buzǵan mobıldi operatorlar - jeke kásipker L.A. Kım men N. Jaınazarov tizilimde tirkelgen kezden bastap Qyzylorda qalasynyń ishinde 128 tehnıkany, sonymen qatar 7 júk jáne 4 jolaýshy avtokóligin tehnıkalyq baıqaýdan ótkizgen.
«Prokýrorlyq qadaǵalaý aktisi boıynsha tehnıkalyq baıqaýdyń mobıldi beketteriniń qyzmeti toqtatyldy, operatorlar ákimshilik jaýapkershilikke tartyldy. Qazir zańsyz berilgen dıagnostıkalyq kartalardyń qoldanysyn toqtatý máselesi qarastyrylýda», delingen habarlamada.