Qyzylordada zańsyz kazıno ıesi 1 mln teńge para usynǵan
QYZYLORDA. QazAqparat - Qyzylorda qalasyndaǵy saýnanyń biri men jaldamaly páterde astyrtyn kazıno ashqan 33 jastaǵy qyzylordalyq azamat A.Ý eki jylǵa bas bostandyǵynan aıyryldy, dep habarlaıdy QazAqparat tilshisi.
Ol ústimizdegi jyldyń qańtar aıynda ustaldy. Jergilikti memlekettik kirister departamentiniń ekonomıkalyq tergeý qyzmeti bul derekti anyqtady. Saýnany tintý barysynda 535 myń teńge men 645 dollar, poker ústeli, fıshkalar jáne oıyn kartasy aıǵaq zattar esebinde tárkilendi. Ol zańsyz isin qaladaǵy jaldamaly páterlerdiń birinde de jalǵastyrǵan.
Qos kazınonyń ıesi bolǵan jigit qylmystyq isti toqtatý maqsatynda ekonomıkalyq tergeý qyzmetkerlerine 1 mln teńge para usynǵan. Bul taǵaıyndalǵan jazany aýyrlata tústi.
«Qylmystyq isti tergeý barysynda saýnadaǵy zańsyz kazıno men jaldamaly páterdegi kazıno bir óndiriske biriktirildi. Sonyń nátıjesinde qylmystyq is sotqa joldanyp, oǵan qatysty úkim shyqty», - deıdi oblystyq memlekettik kirister departamentiniń basqarma basshysy Ardaq Bıǵalıev.
Qazirgi tańda atalǵan azamat Qyzylorda qalasynyń №2 sotynyń úkimimen eki jylǵa bas bostandyǵynan aıyryldy.
Ádiljan Úmbet
