Qyzylordada zańsyz kásipkerlikpen aınalysýshylar tyıylmaı tur
QYZYLORDA. QazAqparat - Qyzylorda qalasynda jeke kásipker retinde tirkelmeı óz isin júrgizetin turǵyndarǵa túsindirme sharalary júrgizilýde, dep habarlaıdy QazAqparat tilshisi Qyzylorda qalalyq ishki saıasat bólimine silteme jasap.
Bul shara «Beıresmı jumyspen qamtylǵan halyqty zańdastyrý, el ekonomıkasyna, mindetti áleýmettik medıtsınalyq saqtandyrý júıesine tartý jónindegi 2018-2019 jyldarǵa arnalǵan uıymdastyrýshylyq is-sharalar josparyna» sáıkes qolǵa alynǵan.
Osyǵan oraı qala ákiminiń 2018 jyldyń 23 qańtardaǵy №724 sheshimmen komıssııa jáne jumys toby qurylǵan. Qazirgi tańda quzyrly organdar men jumysshy topqa, kent jáne aýyldyq okrýg ákimderine shaǵyn jáne orta bıznes sýbektilerin naqtylaý úshin tapsyrmalar berilýde. Mindetti zeınetaqy jarnalarynsyz jumys isteıtinder men jeke kásipker retinde tirkelmeı óz betinshe kásipkerlik qyzmetimen aınalysatyndardy, ózin ózi jumyspen qamtyǵandardy zańdastyrý úshin apta saıyn reıd ótkizilýde.
Qazirgi tańda qala boıynsha jumys tobymen dámhana, sulýlyq salony, kólik jóndeý ortalyqtarynda jáne ózge de jumys oryndarynyń ıelerine túsindirý sharalary júrgizildi. Olarǵa jeke kásipker retinde memlekettik kirister basqarmasyna tirkelip, jumyskerlerdiń mindetti zeınetaqy jarnasyn aýdarý qajettigi jóninde keńester berildi.
Atap aıtqanda, 144 jeke kásipker men 653 mekenjaıda aýlaishilik aralaý jumystary júrgizildi. Shara barysynda jumys berýshiler tarapynan 36 azamatpen eńbek shartty jasalmaǵany anyqtaldy. Osynyń nátıjesinde 26 azamatqa kásibin zańdastyrý jóninde habarlama taratylyp, 258 azamattyń turǵylyqty mekenjaıyn anyqtaýǵa kóshi-qon polıtsııasyna hat joldandy.
Ádilet Qańtarbaev
