Qyzylordada zańsyz ınternet kazıno ashqan adam jazalandy
QYZYLORDA. QazAqparat - Qyzylorda oblysynda zańsyz ınternet kazıno ashqan adam jazaǵa tartyldy, dep habarlaıdy QazAqparat tilshisi.
Qyzylorda oblysy boıynsha ekonomıkalyq tergeý departamenti qyzmetkerleri byltyr tamyz aıynda qalanyń ortalyq kósheleriniń birinde zańsyz oıyn ornyn anyqtaǵan bolatyn. Kóp qabatty úıdiń birinshi qabatyn jalǵa alǵan 29 jastaǵy azamat ol orynnan ınternet kazıno keńsesin ashqan. Onda 13 kompıýterdi ǵalamtor jelisi arqyly bás tigetin qumar oıyndar baǵdarlamasyna qosqan. Oıyn zalyna kúnine 5000 teńge jalaqymen kassır jáne kúzetshi jaldaǵan.
«Zańsyz oıyn oryny áshkerelendi. Kúdiktige barlyq dálelder usynyldy. Kazıony uıymdastyrýshy azamat óz kinásin tolyǵymen moıyndady. Qyzylorda qalalyq №2 soty ony QR Qylmystyq kodeksiniń 307-baby 1-bóligimen kináli dep tanydy. Oǵan 6 aı merzimge bas bostandyǵyn shekteý jazasy taǵaıyndaldy. Osynsha merzimge probatsııalyq baqylaý jáne 100 saǵattyq májbúrli eńbekke tartý belgilendi», - dep málim etti Qyzylorda oblysy boıynsha ekonomıkalyq tergeý departamentinen.
Vedomstvo málimetinshe, byltyr departament tarapynan zańsyz oıyn bıznesine qatysty 8 oıyn mekemesi jabylyp, 11,2 mln. teńgeden asa aqsha zańsyz aınalymnan alynǵan.
Sondaı-aq, budan buryn Qyzylorda oblysynda salyqtan jaltarǵan kásipker memleketke 136 mln teńge shyǵyn keltirgeni habarlanǵan edi https://kaz.inform.kz/news/kyzylorda-oblysynda-salyktan-zahaltargan-kasipker-memleketke-136-mln-tenge-shygyn-keltirgen_a3743690.