Qyzylordada zamanaýı et kombınaty salynady
Búginge deıin aımaqta halyqaralyq standarttarǵa sáıkes keletin et kombınaty bolǵan joq. Sonyń saldarynan maldy shetelge tirideı jiberýge týra keldi. Keı jaǵdaıda ol ónimder ózge oblystardyń et kombınattary arqyly eksportqa shyqty.
Qyzylorda oblysynda sońǵy 6 jylda eksportqa shyǵatyn ónim túrleri 15-ke jetti. Burynǵy jyldarda nebári 3 túrli ónim eksportqa shyǵatyn.
«Tek sońǵy jyldyń ózinde aýyl sharýashylyǵy ónimderiniń eksport kólemi 27 paıyzǵa ósti. Onyń 97 paıyzy - óńdelgen ónimge tıesili. Alǵa qoıǵan mindetimiz - shıkizat óńdeýdi qamtamasyz etý jáne syrtqy naryqqa sapaly daıyn ónim shyǵarý. Oblystyń agroónerkásip keshenindegi eksportqa shyǵatyn ónimderdiń tizimi tek sońǵy 6 jylda 15-ke jetti. Bul bizdiń múmkindigimizdiń shegi emes, oblystyń eksporttyq áleýeti óte aýqymdy», - dedi Qyzylorda oblysynyń ákimi Qyrymbek Kósherbaev.
2016 jyly kóp jyldardan beri alǵash ret baqsha ónimderin eksporttaý isi jańǵyrdy, 2017 jyly Birikken Arab Ámirligine, Iran, Mońǵolııa jáne Ózbekstanǵa kókónis pen mal eksporttala bastady. Al 2018 jyly Qytaıǵa alǵash ret maqsary maıy jóneltildi.
2017 jyly oblys eńbekkerleri eksportqa 2,2 myń qoı jóneltti. 2018 jyly bul kórsetkish 4 esege artyp, 8191 bas mal Reseı Federatsııasy men Iranǵa jóneltildi. Sonymen qatar, jergilikti sharýalar alǵash ret iri qara maldy soıý arqyly eksporttaı bastady.
