Qyzylordada VIP nómir satýdan memleket qazynasyna 61 mln. teńge qarjy túsken
QYZYLORDA. QazAqparat - «Joldaǵy sybaılas jemqorlyqtyń aldyn alýdyń 10 qadamy» jobasymen Syr eline kelgen sapary barysynda qoǵam qaıratkeri Murat Ábenov Qyzylorda oblysynyń sybaılas jemqorlyqqa qarsy is-qımyl departamenti ókilderimen birge «Azamattarǵa arnalǵan úkimet» memlekettik korporatsııasynyń Qyzylorda oblysy boıynsha HQKO departamentiniń mamandandyrylǵan bólimine baryp, atqarylyp jatqan jumystarmen tanysty. Bul týraly QazAqparat tilshisi habarlady.
Ol sońǵy jyldary Qyzylorda oblystyq fılıalynda atqarylyp jatqan jumystarǵa oń baǵasyn berip, qyzmet kórsetý baǵytynyń qolaıly júıege qoıylǵandyǵyn atap aıtty. Ásirese qyzylordalyqtar avtokólikke memlekettik nómir alýda asa belsendilik tanytyp otyr, sonyń nátıjesinde sońǵy bir jarym jyldyń ishinde VIP nómerdi satýdan memleket qazynasyna 61 mıllıon teńgeden astam qarjy túsken.
«Memlekettik qyzmet isteri jáne sybaılas jemqorlyqqa qarsy is-qımyl agenttiginiń «Joldaǵy sybaılas jemqorlyqtyń aldyn alýdyń 10 qadamy» jobasy aıasynda qurylǵan monıtorıngtik top elimizdiń ár aımaqtaryna jol tartty. Maqsat mekemede atqarylyp jatqan jumystarmen tanysyp, jergilikti halyqpen júzdesý», - dedi M.Ábenov.
Búginde azamattarǵa memlekettik qyzmetter kórsetýdi damytýǵa úlken kóńil bólinip, bul baǵytta kóptegen is-sharalar atqarylyp otyrǵany belgili.
Osyǵan oraı, 2015 jylǵy 20 naýryzdan bastap júrgizýshi kýáligin berý jáne avtokólik quralyn tirkeý memlekettik qyzmetterin ońtaılandyrý úshin mamandandyrylǵan Halyqqa qyzmet kórsetý ortalyǵy ashyldy. «Azamattarǵa arnalǵan úkimet» memlekettik korporatsııasynyń Qyzylorda oblysy boıynsha HQKO departamentiniń málimetinshe, qazirgi ýaqytta bul salada da oń ózgerister bar. Barlyq derekqor bazalary men memlekettik organdardyń aqparattyq júıelerin yqpaldastyrý, sondaı-aq júrgizýshi kýáligin berý jáne avtokólik quralyn tirkeýdi biriktirý nátıjesinde osy qyzmetterdi kórsetý ortasha eseppen 1 saǵatqa deıin qysqartyldy.
Mamandandyrylǵan HQKO ashylǵaly beri barlyǵy 102 208 qujat qabyldanǵan. Onyń ishinde «Kólik quralynyń sáıkestendirý nómiri boıynsha kólik quraldarynyń jekelegen túrlerin memlekettik tirkeý jáne esepke alý» kórsetiletin memlekettik qyzmeti boıynsha barlyǵy 76337 qujat, «Júrgizýshi kýáligin berý» kórsetiletin memlekettik qyzmeti 13864 qujat qabyldandy.
