Qyzylordada vaktsına alǵandardyń densaýlyǵyna shaǵymy joq - Jangeldi Shaımbetov
QYZYLORDA. QazAqparat - Qyzylorda oblystyq densaýlyq saqtaý basqarmasy basshysynyń orynbasary Jangeldi Shaımbetov koronavırýs ınfektsııasyna qarsy vaktsına qabyldaýdyń mańyzy zor ekenin atap ótti, dep habarlaıdy QazAqparat tilshisi.
Qyzylorda oblysynda búginge deıin koronavırýs ınfektsııasymen 3675 naýqas tirkelgen. Olardyń 96,6 paıyzy tolyqtaı emdelip shyqty. Ótken táýlikte 9 jaǵdaı anyqtalǵan. Infektsııalyq statsıonarda 27 naýqas jatqyzylsa, onyń 2-ýi jansaqtaý bóliminde em qabyldaýda.
«Oblysta qaterli indetke qarsy ekpe egý 1 aqpannan bastaldy. Óńirge reseılik «Spýtnık V» reseılik vaktsınasynyń 1000 dozasy jetkizilgen. Ekpe egý alǵashqy kezeńde medıtsına salasynyń qyzmetkerlerine júrgiziledi. Onyń ishinde qabyldaý, juqpaly aýrýlar, jansaqtaý jáne hırýrgııalyq bólim qyzmetkerlerine júrgizilýde. Al kelesi kezeńde muǵalimderge jáne juqtyrý qaýpi neǵurlym joǵary jumys oryndarynyń qyzmetkerlerine salynady. Qazirge deıin barlyǵy 680 vaktsına salyndy. Alǵashqy on kúnde ol 640 adamdy qamtysa, sońǵy táýlikte olardyń qataryna taǵy 40 adam qosyldy. Barlyǵy dárigerler baqylaýynda, densaýlyǵyna shaǵymy joq. Myna álemdi jaılaǵan indettiń taralý qaýpin tek ekpe saldyrý arqyly ǵana tómendete alamyz. Sol sebepti barsha halyqty koronavırýstan qorǵaný úshin ekpe saldyrýǵa shaqyramyn», - dedi Jangeldi Shaımbetov.
Esterińizge sala ketelik, budan buryn Qyzylordada on kúnde 640 adam ekpe saldyrǵanyn habarlaǵan edik.
1 aqpannan bastap Qazaqstanda jappaı vaktsınalaý bastaldy. Tegin medıtsınalyq kómektiń kepildik berilgen kólemi aıasynda qazaqstandyqtarǵa koronavırýsqa qarsy egý tegin júrgiziledi.
Koronavırýspen aýyrǵan adamnyń antıdeneler tıtri joǵary bolsa jáne uzaq ýaqyt saqtalsa, vaktsına salýdyń qajeti joq. Al eger antıdene tıtri ýaqyt óte kele tómendese nemese tórtinshi, altynshy aıda nólge deıin tússe, onda ımmýndaý máselesi týyndaýy múmkin.
Vaktsınalaý týraly tolyq aqparatty QazAqparat agenttiginiń arnaıy aıdarynan oqýǵa bolady.
