Qyzylordada úzdik sportshylarǵa páterler berildi
QYZYLORDA. QazAqparat - Qyzylorda oblysynyń ákimi Qyrymbek Kósherbaev jasóspirimder Olımpıadasynda baıdarka jáne kanoede esýden chempıon atanǵan Dıas Bahraddın men paradzıýdodan alǵashqy qazaqstandyq álem chempıony Oljas Orazalyulyna jańa páterlerdiń kiltin tabys etti, dep habarlaıdy QazAqparat tilshisi.
Aımaq basshysymen bolǵan kezdesýge, sondaı-aq dzıýdodan Para Azııa oıyndarynyń kúmis júldegeri Azamat Turymbetov, grek-rım kúresinen Álem chempıonatynda úshinshi oryn alǵan Aıdos Sultanǵalı, baıdarka jáne kanoede esýden Azııa oıyndarynyń qola júldegeri Mereı Medetov, otyryp oınaý voleıbolynan Para Azııa oıyndarynyń qola medal ıegeri Erık Qasqabaev, Shyńǵys Medeýov jáne Almat Manabaev qatysty.
«Bıyl oblys sportshylary álemdik arenalarda kóptegen joǵary tabystarǵa qol jetkizip, táýelsiz elimizdiń mártebesin asqaqtatýda. Oblysta buqaralyq sport, joǵary sport sheberligi, ulttyq sportpen qatar múmkindigi shekteýli sportshylar arasynda da sport qarqyndy damyp keledi. Portýgalııanyń Odıvelash qalasynda paradzıýdodan ótken Álem chempıonatynda Qazaqstan quramasyna jalǵyz altyn medaldi qyzylordalyq Oljas Orazalyuly alyp berdi. Bul - Qazaqstannyń Paralımpııa sporty tarıhyndaǵy alǵashqy medali. Sizderdiń jetken jetistikterińiz - óskeleń urpaqtyń patrıottyq sezimin kúsheıtip, myńdaǵan jastyń sportqa, salaýatty ómir saltyna yntasyn arttyrary sózsiz. Sizder elimizdiń halyqaralyq sporttaǵy mártebesiniń joǵary ekendigin dáleldep, jattyqtyrýshylar men jankúıerlerdiń ǵana emes, barsha qazaqstandyqtardyń úmitin aqtadyńyzdar», - dedi oblys ákimi.
Óz kezeginde Dıas Bahraddın, Aıdos Sultanǵalı jáne Erık Qasqabaev oblys ákimine kórsetilgen qoldaýy úshin alǵystaryn bildirdi.
Sporttaǵy jetistikteri úshin Dıas Bahraddın men Oljas Orazalyulyna páter berildi. Aıdos Sultanǵalıǵa - 3 mln teńgelik, Mereı Medetov pen Azamat Turymbetovke 1 mln teńgelik, Erık Qasqabaev, Shyńǵys Medeýov pen Almat Manabaevqa 500 myń teńgelik aqshalaı sertıfıkattar tabys etildi.
Aıta keteıik, ótken demalys kúnderi Almaty qalasynda Qazaq sport jáne týrızm akademııasy men «Sport juldyzdary» respýblıkalyq jýrnaly uıymdastyrǵan marapattaý rásiminde Qyzylorda oblysynyń ákimi Qyrymbek Kósherbaev «Sportqa janashyr úzdik oblys ákimi» atandy.
Sońǵy eki jylda aımaqta 16 sport ǵımaraty paıdalanýǵa berildi. Onyń 9-y memlekettik-jekeshelik áriptestik aıasynda, 7-i oblystyq bıýdjet esebinen salyndy.
