Qyzylordada úzdik kásipkerlerge 1 mln teńgeden berildi
QYZYLORDA. QazAqparat - Qyzylorda oblysynda kásibin jańadan bastaǵan úzdik kásipkerlerge 1 mln teńgeden syıaqy berildi, dep habarlaıdy QazAqparat tilshisi.
Búgin jappaı kásipkerlikti damytý jylynyń qorytyndysy boıynsha keńes ótti. Onda shaǵyn jáne orta bıznesti damytýǵa qosqan úlesi úshin kásibin jańadan bastaǵan úzdik kásipkerler marapattaldy. Olarǵa 1 mln teńgeden syıaqy berildi.
Atalmysh shara barysynda Qyzylorda oblysynyń ákimi Qyrymbek Kósherbaev jappaı kásipkerlikti damytý arqyly mańyzdy 3 másele sheshilip jatqanyn atap ótti. Osynyń nátıjesinde salyq bazasynyń ulǵaıýy, jańa jumys oryndarynyń qurylýy jáne qoǵamdyq-saıası ahýal turaqtylyǵynyń jaqsarýyna jol ashyldy.
«Bizdiń oblysta ótken jyly jalpy bıýdjeti 32 mlrd teńge bolatyn arnaıy «Jol kartasyn» ázirlendi. Bul qarajattyń 3 mlrd teńgeden astam bóligi «Startap» jobalarǵa baǵyttaldy. Al bıylǵy jyly ártúrli qarjy kózderinen 34 mlrd teńge qarastyrylyp otyr. Sonymen birge, qaıtarymsyz granttar, shaǵyn nesıeler men nesıelerdi alýdyń qadamdyq is-áreketteri, tıptik bıznes josparlardy ázirleýge mán berip otyrmyz. Bul maqsatta jobalardy súıemeldeý úshin árbir aýyldyq okrýgke oblystyq deńgeıden jaýapty laýazymdy tulǵalar bekitildi», - dedi oblys ákimi Qyrymbek Kósherbaev.
Aıta keteıik, 2018 jyldyń basynda oblysta 37450 shaǵyn jáne orta bıznes nysany bar dep eseptelgen. Qazirgi tańda olardyń sany 42 342-ge jetip otyr. ıAǵnı, bir jyl ishinde oblystaǵy jumys istep turǵan shaǵyn jáne orta bıznestiń sany 4 892 nysanǵa ulǵaıdy.
Keńes qorytyndysy boıynsha «Úzdik jas kásipker», «Úzdik aýyl ákimi», «Úzdik bekitilgen jaýapty tulǵalar» (kýrator) nomınatsııalary boıynsha azamattar marapattaldy. Aýdandardan jáne oblys ortalyǵynan isin jańadan bastaǵan 8 úzdik kásipker 1 mln teńgeden aqshalaı syıaqy aldy. Al aýyl ákimderi men aýyldyq okrýgterde jappaı kásipkerlikti damytýǵa jaýapty laýazymdy tulǵalar qurmet gramotalary men syılyqtarǵa ıe boldy.
Syr óńirinde kásipkerlikti qoldaý baǵytynda ıgilikti ister atqarylyp keledi. Jumys istep turǵan kásipkerlerdi qoldaý jáne kásibin jańadan bastaǵan jas kásipkerlerge jaǵdaı jasaý úshin óńirde Kásipkerler úıi ashyldy. Oblysta ákimshilik kedergilerdi azaıtý boıynsha jumystar jalǵasýda. 2017 jyly respýblıka boıynsha Qyzylorda oblysynda alǵash ret oblystyq kásipkerlik jáne týrızm basqarmasy janynan Kásipkerlerge qyzmet kórsetý ortalyǵy quryldy.
Esterińizge sala keteıik, 2018 jyldyń qorytyndysy boıynsha Qyzylorda oblysy bıznesti júrgizýge qolaıly jaǵdaı jasaǵan eń úzdik oblys dep tanyldy.
Budan buryn Qyzylorda oblysynda 25 ındýstrııalyq joba iske asp jatqanyn habarlaǵan edik.
