Qyzylordada úzdik kásipkerge mln teńge beriledi

QYZYLORDA. QazAqparat. Qyzylorda oblysynda kásipkerlik salasy boıynsha joǵary nátıjege qol jetkizgen úzdik kásipker, aýyl ákimi, árbir aýylǵa bekitilgen jaýapty tulǵa jáne kásipkerler palatasynyń aýdandyq ókildikteri anyqtalady. Olardyń árbirine 1 mln teńge kóleminde qarjylaı syıaqy tabys etiledi, dep habarlaıdy QazAqparat tilshisi.

«Ótken aıda kásipkerlikti damytý máselesine qatysty aýdandardy aralap shyqtyq. Oǵan oblys ákimi Qyrymbek Kósherbaev ta qatysty. Ol árbir aýdanda salany damytýǵa baılanysty arnaıy májilis ótkizdi. Jaýapty mamandardyń esepterin tyńdap, aýdan, aýyl ákimderinen bul baǵyttaǵy jumystardyń kemshin tustarynyń sebep-saldaryn surap, jumysty qatań talap etti», - dedi  oblystyq kásipkerler palatasynyń dırektory Ǵalymbek Jaqsylyqov.

Aıta ketý kerek, bıylǵy jyl Qyzylorda oblysynda «Jappaı kásipkerlikti damytý jyly» bolyp bekitildi. Salany damytý úshin jergilikti atqarýshy organ tarapynan erekshe qoldaý kórsetilýde. Osy rette, oblys basshysy ákimdikke qarasty barlyq laýazymdy tulǵalardy (oblys ákiminiń orynbasarlary, basqarma basshylary) aýdanǵa, tipti aýylǵa jaýapty retinde bekitti. Árbir toqsan saıyn keńeıtilgen jıynda sol aýylda, aýdanda kásipkerliktiń damý kórsetkishi, usynylǵan, qarjylandyrylǵan jobalar, tipti jaýapty laýazymdy tulǵanyń salany damytý úshin naqty qabyldaǵan sharalary týraly esepke alynyp otyr. Al bekitilgen memlekettik qyzmetkerler aýdandy, aýyldy aralap, ákimderimen baılanysyp, jobalardy qorǵaýǵa qatysyp, belsendilik tanytýda.

Osylaısha Qyzylorda oblysynda kásipkerlik salasyndaǵy úzdikterdi qarjylaı syıaqymen marapattaý týraly sheshim qabyldandy. Nátıjesi jyl sońynda belgili bolmaq.