Qyzylordada úılerdi gazǵa zańsyz qosqan qyzmetker ótemaqy tólemek
QYZYLORDA. QazAqparat - Qyzylorda qalasynda merdiger kompanııa qyzmetkeri basshylyqtyń qoltańbasy men mórin paıdalanyp, kópqabatty úılerdi gazǵa zańsyz qosyp bergen. Endi bul úıler jappaı gazdan ajyratylýda, dep habarlaıdy QazAqparat tilshisi.
Jibek joly kóshesi boıyndaǵy kópqabatty úsh úıdiń turǵyndary tabıǵı gazdan ajyratylyp jatqany týraly shaǵym bildirgen. Aıtýlarynsha, páterlerge kógildir otyn berilgenimen, kóp uzamaı gaz berý toqtatylǵan.
Al mamandar úılerge tabıǵı otyn zańsyz kirgizilgenin alǵa tartady. Oblystyq energetıka jáne kommýnaldyq-sharýashylyq basqarmasynyń gaz ınfraqurylymyn damytý jáne qaýipti óndiristik nysandardy memlekettik baqylaý bóliminiń basshysy Oljas Ismalaev málim etkendeı, kompanııa qyzmetkeri basshylyqtyń qoltańbasy men mórin qoldan jasaǵan.
«Patsaıy» JShS ókiliniń aıtýy boıynsha, kompanııa qyzmetkeri basshynyń qoltańbasy men mórin qoldan jasap, turǵyndarmen zańsyz kelisimshart jasasqanyn moıyndap otyr. Osyǵan oraı «QazTransGaz Aımaq» AQ zańsyz qosylǵan gaz qubyrlaryn turǵyn úıden ajyratqan. Qazirgi tańda zańdy túrde kógildir otynǵa qosý jumystary jedel júrgizilýde. Aıdyń aıaǵyna deıin bul másele retteledi», - dedi Oljas Ismalaev.
Atap ótilgendeı, kompanııa qyzmetkeri jumystan shyǵarylatyn bolady. Sondaı-aq ol turǵyndarǵa óz qarjysy esebinen shyǵyndaryn ótep beredi.
