Qyzylordada úı aýlasyndaǵy kólik órtenip ketti: Birneshe kúdikti ustaldy
Oqıǵa keshe, 21 qarashada saǵat 22.44-te boldy. Qyzylorda qalasynda Baıqońyr kóshesindegi turǵyn úı janynda turǵan «Opel Vectra» avtokóligi otqa orandy.
«Órt 22.59-de oqshaýlandy. Al 23.01-de tolyqtaı sóndirildi. Zardap shekkender joq. Oqıǵa ornyna tótenshe jaǵdaılar departamentinen 9 adam, 2 tehnıka bardy», - dep málim etti Qyzylorda oblystyq Tótenshe jaǵdaılar departamenti baspasóz qyzmetiniń bas mamany Aıgúl Nurmanova.
Aldyn ala boljam – kólikke qasaqana órt qoıylǵan.
Qyzylorda qalalyq polıtsııa basqarmasy atalǵan is boıynsha tergeý júrip jatqanyn habarlady.
«QR Qylmystyq kodeksiniń 202-baby 2-bóliginiń 1-tarmaǵymen (bótenniń múlkin órt qoıý arqyly qasaqana joıý) qylmystyq is tirkelip, tergep-tekserý júrgizilýde. Oqıǵaǵa kúdikti retinde 22 qarashada Qyzylorda qalasynyń azamattary ustalyp, ýaqytsha ustaý ızolıatoryna oqshaýlandyryldy.
Qylmystyq-protsestik kodeksiniń 201-babynyń talaptaryna sáıkes, tergeý derekterin jarııa etýge jol berilmeıdi», - dep málim etti polıtsııa basqarmasynan.
