Qyzylordada úı alyp berem dep 20 mln. teńge jymqyrǵan qala turǵyny sottaldy
QYZYLORDA. QazAqparat-Qyzylordada jurtty aldap, alaıaqtyqpen 20 mln. teńge jınaǵan qala turǵyny isti boldy,-dep habarlady QazAqparat HAA tilshisi oblystyq sotqa silteme jasap.
Alaıaq áýelde «Araı-2» móltek aýdanynan salynyp jatqan kópqabatty úılerden 2-bólmeli páter alyp beremin dep jábirlenýshiden 500 000 teńgesin alady. Osydan keıin qalalyq ákimshilikte jumys isteıtin tanysy arqyly kópqabatty úılerden 2 bólmeli páter alyp beremin dep taǵy bir turǵynnan 723 000 teńge alǵan. Sotta alaıaqtyń 30 adamnan barlyǵy 20 mln-nan astam teńgeni aldap alyp, olardyń qarajattaryn qaıtarmaı bas paıdasyna jaratqany anyqtaldy.
Osy qylmystyq is boıynsha Qyzylorda qalalyq №2 sotynyń sýdıasy D.Álıev BAQ ókilderiniń qatysýymen brıfıng ótkizdi.
Onyń aıtýynsha, sottalýshy Qazaqstan Respýblıkasy QK 190 babynyń, 3 bóliginiń, 1 tarmaǵy boıynsha kináli dep tanylyp, múlki tárkilengen jáne oǵan 4 jyl 6 aıǵa bas bostandyǵynan aıyrý jazasy taǵaıyndalǵan.
«Qazaqstan Respýblıkasy Táýelsizdiginiń jıyrma bes jyldyǵyna baılanysty raqymshylyq jasaý týraly Qazaqstan Respýblıkasynyń Zańynyń 2016 jylǵy 13 jeltoqsandaǵy № 27-VІ QRZ 4 baby, 1 bóligi, 2 tarmaǵyna sáıkes, jaza merziminiń ótelmegen bóliginiń jartysyn qysqartyp, túpkilikti múlkin tárkilep, 2 jyl 3 aıǵa bas bostandyǵynan aıyrýǵa, jazasyn jalpy rejımdegi túzeý kolonııasynda óteý belgilendi», - deıdi D.Álıev.
Sot úkimi zańdy kúshine engen joq.
