Qyzylordada ustazdarǵa qurmet kórsetildi
Saltanatty sharaǵa bilim salasynyń ardagerleri, mektep dırektorlary, muǵalimder men jas pedagogtar shaqyryldy.
Tól merekede aımaq basshysy eńbegimen eldiń qurmetine bólengen pedagogtardy quttyqtap, bala janynyń tárbıeshisi atanǵan ustazdardyń jumysyn joǵary baǵalaıtynyn tilge tıek etti.
«Álemdi jaılaǵan pandemııa saldarynan qıyndyqpen betpe-bet kelgen osyndaı syndarly kezeń muǵalimderge de ońaı tıgen joq. Ustazdardyń jańa tehnologııamen baılanysty daǵdylardy tez ıgerip, tosyn jaǵdaıǵa shuǵyl beıimdelýine týra keldi. Ata-analar da óz kezeginde ustazdar qaýymyna qoldaýlaryn bildirdi. Búgingi mereıli sátti paıdalana otyryp, barlyq kedergi men qıyndyqqa qaramastan, jańa ǵasyrdyń zerdeli urpaǵyn tárbıeleý jolynda talmaı eńbek etip júrgen Ustazdar qaýymyna alǵys aıtamyn. Muǵalimge qoldaý kórsetý - árdaıym bizdiń basty nazarda. Bıyl bilim berý salasyna oblys bıýdjetiniń 45 paıyzy, ıaǵnı 171 mıllıard teńgeden astam qarjy bólindi. El Prezıdenti Qasym-Jomart Toqaev bıylǵy Joldaýynda pedagogıka salasy qyzmetkerleriniń jalaqysyn jyl saıyn kóterýdi tapsyrdy. Prezıdent tapsyrmasyn oryndaý maqsatynda 2021 jyly oblysqa respýblıkalyq bıýdjetten 32 mıllıard teńge qarjy bólindi. Aldaǵy jyldarda bul óz jalǵasyn tabady. Sáıkesinshe ustazdarǵa qoıylatyn talap ta kúsheıedi. Sondyqtan, bilim sapasynyń joǵary deńgeıde bolýy asa mańyzdy», - dedi Gúlshara Ábdiqalyqova.
Óńir basshysy ustazdarǵa arnalǵan ystyq lebizinen soń, otandyq bilim salasyna eleýli úles qosqan tájirıbeli ustazdarǵa túrli deńgeıdegi marapattardy tabystady.
Ustazdar basqosýynda Y.Altynsarın tósbelgisimen Qarmaqshy aýdany, Baıqońyr qalasy, №277 mektep-lıtseıiniń bastaýysh synyp muǵalimi Aqzııa Baıtóreeva, Qyzylorda qalasyndaǵy №176 orta mektebiniń dırektory, qazaq tili men ádebıeti pániniń muǵalimi Qadirkúl Shaımaǵanbetova, «ORDA SCHOOL» mektebiniń dırektory Raýash Alıeva, M. Mámetova atyndaǵy Qyzylorda pedagogıkalyq joǵary kolledjiniń matematıka pániniń muǵalimi Ǵazıza Sýhanberdına jáne № 10 daryndy balalarǵa arnalǵan oblystyq «Bilim-ınnovatsııa» lıtseı-ınternatynyń qazaq tili men ádebıeti pániniń muǵalimi Naǵısha Esbosyn marapattaldy.
Munan bólek, 2 sala qyzmetkerine «Bilim berý isiniń qurmetti qyzmetkeri» tósbelgisi, 2 ardager ustazǵa «Eńbek ardageri» tósbelgisi tasbystaldy.
Al 11 pedagog «Qyzylorda oblysynyń bilim salasyn damytýdaǵy eńbegi úshin jergilikti erekshelik belgisimen» marapattaldy.
Aıta ketsek, ótken jyldan bastap konkýrstyq negizde úzdik ustazdarǵa 300 aılyq eseptik kórsetkish mólsherindegi qarjylaı syıaqy tabystaldy.
Bıyl da 10 ustaz «Úzdik pedagog-2021» oblystyq baıqaýynyń jeńimpazy atanyp, 875 myń teńge kólemindgi qarjylaı qoldaýǵa ıe boldy.
Aıta keteıik, búgingi kúni óńirde 22 myńnan asa muǵalim qyzmet etse, olardyń 94,2 paıyzy joǵary bilimdi pedagog.